Esep komiteti quqyq qorǵaý organdaryna 121 material joldady. Bul týraly Senattyń jalpy otyrysynda 2021 jylǵy biýdjettiń oryndalýy týraly esepti qaraý kezinde Respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnova aitty, dep habarlaidy QazAqparat.
«2020 jylǵa qaraǵanda 2021 jyly bul saladaǵy talaptardy buzý deńgeii 27 paiyzǵa az boldy. Esepti kezeńde tiimsiz jumsalǵan qarajat somasy 413 mlrd teńgeni qurady. Onyń ishinde qarjy salasyndaǵy talaptardy buzý baǵytynda 79 mlrd teńge anyqtalsa, sonyń 85 paiyzy býhgalterlik esepke qatysty. Tiimsiz josparlaý men paidalaný turǵysynda 200 mlrd teńgeden astam qarajat tirkeldi. Respýblikalyq biýdjetke qaitarylǵan soma 17 mlrd teńge boldy. Baqylaý shotyndaǵy qaldyq qarajat – 47 mlrd teńge», - dedi Godýnova.
Onyń aitýynsha, sońǵy úsh jylda Esep komiteti quqyq qorǵaý organdaryna 121 materialdy joldady. Sonyń arasynda 56-sy byltyr qarastyryldy.
«Qazirgi kezde 32 material qaralyp jatyr, sotqa tek 3 is jiberildi. Osy oraida materialdyń birazy boiynsha tergeý amaldary qaita qozǵalyp jatyr. Atap aitqanda, júrgizilgen aýditke qatysty Úkimet anyqtalǵan kemshilikterdi túzetý baǵytyndaǵy jumystardy atqaryp jatyr», - dedi Esep komitetiniń basshysy.
Budan buryn habarlanǵandai, Jamaýbaev jalpy sipattaǵy transfertterdi kóbirek alý úshin jergilikti jerlerde salyq bazasyn kemitip kórsetý faktilerine qatysty Esep komitetiniń eskertýi oryndy ekenin aitty.
