ەسەپ كوميتەتٸ قۇقىق قورعاۋ ورگاندارىنا 121 ماتەريال جولدادى. بۇل تۋرالى سەناتتىڭ جالپى وتىرىسىندا 2021 جىلعى بيۋدجەتتٸڭ ورىندالۋى تۋرالى ەسەپتٸ قاراۋ كەزٸندە رەسپۋبليكالىق بيۋدجەتتٸڭ اتقارىلۋىن باقىلاۋ جٶنٸندەگٸ ەسەپ كوميتەتٸنٸڭ تٶراعاسى ناتاليا گودۋنوۆا ايتتى, دەپ حابارلايدى قازاقپارات.
«2020 جىلعا قاراعاندا 2021 جىلى بۇل سالاداعى تالاپتاردى بۇزۋ دەڭگەيٸ 27 پايىزعا از بولدى. ەسەپتٸ كەزەڭدە تيٸمسٸز جۇمسالعان قاراجات سوماسى 413 ملرد تەڭگەنٸ قۇرادى. ونىڭ ٸشٸندە قارجى سالاسىنداعى تالاپتاردى بۇزۋ باعىتىندا 79 ملرد تەڭگە انىقتالسا, سونىڭ 85 پايىزى بۋحگالتەرلٸك ەسەپكە قاتىستى. تيٸمسٸز جوسپارلاۋ مەن پايدالانۋ تۇرعىسىندا 200 ملرد تەڭگەدەن استام قاراجات تٸركەلدٸ. رەسپۋبليكالىق بيۋدجەتكە قايتارىلعان سوما 17 ملرد تەڭگە بولدى. باقىلاۋ شوتىنداعى قالدىق قاراجات – 47 ملرد تەڭگە», - دەدٸ گودۋنوۆا.
ونىڭ ايتۋىنشا, سوڭعى ٷش جىلدا ەسەپ كوميتەتٸ قۇقىق قورعاۋ ورگاندارىنا 121 ماتەريالدى جولدادى. سونىڭ اراسىندا 56-سى بىلتىر قاراستىرىلدى.
«قازٸرگٸ كەزدە 32 ماتەريال قارالىپ جاتىر, سوتقا تەك 3 ٸس جٸبەرٸلدٸ. وسى ورايدا ماتەريالدىڭ بٸرازى بويىنشا تەرگەۋ امالدارى قايتا قوزعالىپ جاتىر. اتاپ ايتقاندا, جٷرگٸزٸلگەن اۋديتكە قاتىستى ٷكٸمەت انىقتالعان كەمشٸلٸكتەردٸ تٷزەتۋ باعىتىنداعى جۇمىستاردى اتقارىپ جاتىر», - دەدٸ ەسەپ كوميتەتٸنٸڭ باسشىسى.
بۇدان بۇرىن حابارلانعانداي, جاماۋباەۆ جالپى سيپاتتاعى ترانسفەرتتەردٸ كٶبٸرەك الۋ ٷشٸن جەرگٸلٸكتٸ جەرلەردە سالىق بازاسىن كەمٸتٸپ كٶرسەتۋ فاكتٸلەرٸنە قاتىستى ەسەپ كوميتەتٸنٸڭ ەسكەرتۋٸ ورىندى ەكەنٸن ايتتى.
