Ult portaly poshtasyna "Turan Álem Bankiniń" burynǵy basshysy Erjan Tátishevtiń otbasy atynan hat kelip tústi. Jaqynda ǵana Tátishev ólimine qatysty derekter qaita qaralyp, 13 jyldan keiin sheshim ózgergen bolatyn. Osy oqiǵaǵa qatysty Erjan Tátishev januiasy úndeý hat jazǵan eken. Nazarlaryńyzǵa usynamyz.
***
Ýaqytqa tótep bergen tóreshi – ol ádildik.
Ómirden erte ozǵan Erjannyń júregimizdegi ǵumyry máńgi bola bermek.
Kóp kútken úkim kúshine enip, qylmyskerler óz kinásin moiyndaǵan bul kúnde iyq súiesip, bizdermen birge ádil zańǵa úmit artyp, osy kúreste qoltyǵymyzdan súiep, demeý bolǵan izgi nietti adamdarǵa alǵys aitqymyz keledi. Bul kúres tabany kúrektei 14 jylǵa sozylyp, aqyry ádildik ýaqyttyń ózine tótep berip, tóreligin aitty.
Sergeldeńge salǵan osy jyldar boiy qóńilimiz qulazyp, qabyrǵamyz qaiysty. Jan túrshigerlik jaýyz qylmystar zor mártebe, qudiret-mansap, qisapsyz aqshanyń tasasynda qalyp, saiasat syltaýymen jyly jabylyp kelgeni janymyzǵa batty. Biraq, bizderdei zań kúshine senip, shyndyq úshin kúresken tileýlester dáiim janymyzdan tabylyp keldi. Aqyry aq-qarasyn aiyrǵan ádil tergeý, ashyq sot shytyrmannyń shiesin tarqatyp, jaýyzdar jazasyn aldy.
Qolmen istegendi moiynmen kótermek kerek. Eshkim de zań quryǵynan qutylmaidy. Erjanǵa qarsy qylmystarǵa qatysy bar qandyqol qaraqshylardyń bári de sazaiyn tartatynyn bilemiz hám senemiz. Árine, bul senim qazanyń ornyn toltyryp, qasiretten aryltpas, alaida, abzal ul, aǵa, jar, áke bolǵan aiaýly jannan aiyrylǵan jaradar qóńilderdi jubatyp, jylaýly kózderdiń jasyn tyiýǵa sep bolary anyq.
Mine, búginde ádildik izdep alasurǵan barsha jandarǵa bizdiń aitarymyz: tuiyqqa tireldik dep, toqtamańyzdar. Maqsatqa jetpei, tynbańyzdar. Ózgeler kúder úzse de, kúrese berińizder. Kúresken jeter muratqa!
Tátishev januiasy!
