Tarazda Turan Álem bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot protsesi jalǵasýda. Kýáger búgingi otyrysta Tátishev óltirilgen qarýǵa eki ret saraptama jasalǵanyn jáne árqaisynda ártúrli qorytyndy shyǵarylǵanyn aitty, dep habarlaidy Baq.kz tilshisi.
Búgin Sot saraptama ortalyǵynyń burynǵy qyzmetkeri Sergei Ýfimtsevten jaýap alyndy. Kýágerdiń aitýynsha, 2005 jyly Erjan Tátishevtiń ólimine qatysty isti tergeý barysynda qarý mehanikasy ózgertilgen.
«2005 jyly men saraptama jónindegi komissiia quramynda boldym. Qolǵa saraptama qorytyndysyn alǵan soń Bishmanov (Sot saraptama ortalyǵynyń basshysy - avt.) Astanadan kelip, meni kabinetine shaqyryp aldy. Ol saraptama komissiiasynyń basshysy bolatyn. Bishmanov ortalyqtan tapsyrma kelgenin alǵa tartyp, qarý ózi atyp ketetindei ilgegin bosatý kerektigin aitty. Men onyń aitqanyn istedim. Osydan soń qarýdy saraptama jasaityn Kisilevke aparyp berdim», - dedi Ýfimtsev.
Kýáger qarýdy sarapshyǵa kórsetkennen keiin Kisilevtiń tańyrqaǵanyn aitty. Sebebi, alǵashqy saraptama qarýdyń durys isteitinin kórsetken edi. Ýfimtsev Kisilevke bul tapsyrmany Sot saraptama ortalyǵynyń ótinishimen Bishmanov bergenin jetkizgen. Osy áńgimeden keiin Kisilev Bishmanovqa barǵan, biraq ol «shý shyǵarmai, tynysh otyryńdar» dep qorqytqan.
Eske salsaq, 2007 jyly Murathan Toqmádi Erjan Tátishevti abaisyzda óltirgeni úshin sottalǵan bolatyn. Taraz qalalyq sotynyń 2007 jylǵy 3 qyrkúiektegi úkimimen Toqmádi bir jylǵa bas bostandyǵynan aiyrylyp, raqymshylyqpen jazadan bosatylǵan edi.
Atap ótsek, Tarazda Turan Álem bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot protsesi ótip jatyr. Osylaisha, 14 jyl burynǵy qylmys qaita tekserilýde. Al, 11 jyl buryn biznesmen Toqmádi dál osy qylmysy úshin jazadan sytylyp ketken bolatyn. Sol kezde qylmys abaisyzda jasaldy delingen edi.
2017 jylǵy 12 maýsymda Almatydaǵy arnaiy operatsiia barysynda «QazStroiSteklo» JShS bas direktorynyń keńesshisi Murathan Toqmádi ustaldy. Biznesmen «Iri kólemdegi múlikke ie bolý maqsatynda bopsalaý» baby boiynsha qylmys jasady degen kúdikpen quryqtalyp, úsh jylǵa bas bostandyǵynan aiyryldy.
2017 jyldyń qazanynda KTK arnasynan kórsetilgen filmde Toqmádi Erjan Tátishevti óltirgenin moiyndap, bankirdiń kózin Muhtar Áblázovtyń tapsyrysymen joiǵanyn aitty. Sondai-aq, Áblázovten Tátishevti óltirý úshin 2 transhpen 4 mln dollar kóleminde syiaqy alǵanyn da jasyrmady. Osylaisha, Muhtar Áblázov Erjan Tátishevtiń óliminen keiin Turan Álem bankiniń basshylyǵyna kelgen. 2018 jylǵy 16 aqpanda Jambyl oblystyq sotynda Toqmádiden jaýap alynyp, ol osy aitqandaryn rastady.
