Tarazda Turan Álem bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot protsesi jalǵasýda. Búgin Erjan Tátishev qaza tapqan kúni oqiǵa ornynda bolǵan Tátishevtiń oqqaǵary Aleksandr Halinnen jaýap alyndy, dep habarlaidy Baq.kz tilshisi.
«2002 jyly Turan Álem bankinde kúzet qyzmeti kúsheitiletin bolǵandyqtan bizdi iriktep aldy. Bilýimshe, bank tóraǵasy Erjan Tátishev kúzetetin adamdar qajet bolǵan. Meni kúzet kóligine júrgizýshi retinde bekitti. Oqiǵa bolǵan kúni men, Qanat Ahmatolla jáne Sergei Kozlikin Erjan Tátishevtiń úiine eki kólikpen keldik. Erjan Tátishev pen Murathan Toqmádidi alyp, ańǵa shyqtyq. Biz jolda eshqandai qarý daýysyn estimedik. (Tátishev, Toqmádi men Kozlikin bir kólikte otyrsa, Ahmatolla, Halin ekinshi kólikte otyrǵan - avt.) Alda kele jatqan kóliktiń shuńqyrǵa túsip kete jazdaǵanyn kórdik. Kozlikin ratsiiamen habarlasyp, bizdi jyldam kelińder dep shaqyrdy. Biz kelgende Kozlikin kóliktiń janynda tursa, Toqmádi mashinanyń janynda tizerlep, aiǵailap otyrdy. Al, qaza tapqan Tátishevdiń jelke jaǵynyń tesilgenin baiqadym. Artqy orynda qarý jatty. Erjan Tátishev rólde otyrsa, Kozlikin aldyńǵy jolaýshy ornynda otyrǵanyn bildim. Birazdan keiin Murathan Toqmádi kólikke kirip, jyly kiinip shyqty. Odan keiin politsiia qyzmetkerleri keldi», - dedi Halin.
Prokýror Iliias Esqaliev kýágerden Turan Álem bankiniń tóraǵasy Erjan Tátishevtiń kúzetiniń kúsheitilý sebebin surady. Kýágerdiń aitýynsha, buǵan Tátishevtiń ómirine birneshe ret qastandyq jasalǵany sebep bolǵan eken. Al, Aleksandr Halin 2002-2004 jyldar aralyǵynda Tátishevtiń kúzetshisi qyzmetin atqarǵan.
Buǵan deiin Erjan Tátishev qaza bolǵan kezde onymen bir kólikte otyrǵan Sergei Kozlikin men birge ańǵa shyqqan Qanat Ahmatolladan jaýap alynǵan edi. Olardyń ekeýi de Erjan Tátishevtiń oqqaǵary bolǵan.
Sondai-aq, 20 aqpan kúngi sot otyrysynda Turan Álem bankiniń burynǵy qyzmetkeri Veronika Efimova 2005 jyly kúzde Muhtar Áblázovten 2 mln dollar qolma-qol aqsha daiyndaý týraly tapsyrma kelgenin aitqan edi. Búgin valiýta aiyrbastaýmen ainalysatyn «Astana Indeks» JShS kassiri Elena Týtikten jaýap alynyp, ol Efimovanyń sózderin rastady. Elena Týtik Ashat pen Talǵat Seiitovter (Ashat Seiitov - «Astana Indeks» JShS basshysy-avt.) Muhtar Áblázov úshin 2 mln dollar daiyndaǵanyn aitty.
«Bul úlken soma bolǵandyqtan biz ony qaladaǵy aiyrbastaý pýnkteri men bankterden satyp aldyq. Búkil aqshany bir apta nemese shamamen on kúndei jinadyq. Ashat Seiitov áńgimeleriniń birinde bul soma Muhtar Áblázovke arnalǵanyn aitqany esimde», - deidi Elena Týtik.
Atap ótsek, Tarazda Turan Álem bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot protsesi ótip jatyr. Osylaisha, 14 jyl burynǵy qylmys qaita tekserilýde. Al, 11 jyl buryn biznesmen Toqmádi dál osy qylmysy úshin jazadan sytylyp ketken bolatyn. Sol kezde qylmys abaisyzda jasaldy delingen edi.
2017 jylǵy 12 maýsymda Almatydaǵy arnaiy operatsiia barysynda «QazStroiSteklo» JShS bas direktorynyń keńesshisi Murathan Toqmádi ustaldy. Biznesmen «Iri kólemdegi múlikke ie bolý maqsatynda bopsalaý» baby boiynsha qylmys jasady degen kúdikpen quryqtalyp, úsh jylǵa bas bostandyǵynan aiyryldy.
2017 jyldyń qazanynda KTK arnasynan kórsetilgen filmde Toqmádi Erjan Tátishevti óltirgenin moiyndap, bankirdiń kózin Muhtar Áblázovtyń tapsyrysymen joiǵanyn aitty. Sondai-aq, Áblázovten Tátishevti óltirý úshin 2 transhpen 4 mln dollar kóleminde syiaqy alǵanyn da jasyrmady. Osylaisha, Muhtar Áblázov Erjan Tátishevtiń óliminen keiin Turan Álem bankiniń basshylyǵyna kelgen. 2018 jylǵy 16 aqpanda Jambyl oblystyq sotynda Toqmádiden jaýap alynyp, ol osy aitqandaryn rastady.
