«Junior Eurovision Song Contest 2019» halyqaralyq án baiqaýyna qatysý usynysyna birden kelisken joqpyz. Tanymal jas ánshi Erjan Maksimniń anasy Gúlmira Álibek osylai málim etti, dep habarlaidy "Ult aqparat".
Erjan Maksim – Reseidiń eń tanymal, aýqymdy «Golos.Deti» jobasynyń jeńimpazy, talantty qazaqstandyq jas ánshi. Atalmysh shoýdyń finalyna jetken jas órenge myńdaǵan tyńdarman daýys berip, nátijesinde ol asqan tanymaldylyqqa ie boldy. Boiyndaǵy talantymen tyńdarmandy tánti etken 12 jasar Erjan 24 qarashada Polshanyń Glivitse qalasynda ótetin «Junior Eurovision Song Contest 2019» halyqaralyq án baiqaýynda Qazaqstannyń namysyn qorǵaidy. Búginde ol «Balalar Eýrovijn» baiqaýyna qyzý daiyndyq ústinde. Bul joly biz Erjannyń eń jaqyn, tuńǵysh tyńdarmany, qoldaýshysy, kómekshisi - anasy Gúlmira Álibekpen suhbattasqandy jón kórdik.
- Armysyz, Gúlmira hanym. Onsyz da daiyndyqpen qaýyrt bolyp jatqan ýaqytyńyzdy bólip, suhbatymyzǵa keliskenińiz úshin kóp rahmet. Erjannyń jaǵdaiy jaqsy ma? Polshadasyzdar ma? Glivitse qalai?
- Sálemetsizder me. Oqasy joq. Erjan balam shúkir jaqsy, rahmet. Iá, Polshadamyz. Glivitse aman-esen.
- Ádetten ozbai, suhbatymyzdy basynan bastasaq. Erjan Maksim 3 jasynan án aityp, kópshilik kózine túse bastaǵanyn aitqan bolatynsyz. Ánshilik ónerge aiaq basýyn esińizge alyńyzshy...
- Erjan 3 jasynan bastap estý qabiletimen kózge túsip, kez kelgen áýenge, ánge ilesip ketetin. Bir kúni ákesiniń 40 jas merei toiynda,qonaqtardyń aldynda eki ánin jandy daýysta aitty. Eshqandai qysylmastan, sonda bar týystarymyz, dostarymyz qoldap, myna balany bir jerge aparyńyzdar, damytyńyzdar talabyn dep aitqannan keiin, oǵan deiin de oiymyzda bolǵan, Oral qalalyq mádeniet úiiniń vokal úiirmesine apardyq. Dariia Baqytova jetekshisi boldy. Sodan bastaldy. 7 jasynan bastap baiqaýlarǵa qatysyp. Júldeli oryndarǵa ie bola bastady. Qazirgi tańda alǵan marapattary, jetistikteri kóp,shúkir.
- Qatelespesem, Erjan, ákesi , ózińiz Máskeýde turyp jatyrsyzdar..
- Iá, qai ata-ana bolsyn, qashan da balasynyń baqyty úshin kúresýi – zańdy. Dál osy maqsatta, balamyzdy qoldap qazirgi kezde Máskeý qalasynda, Reseide turyp jatyrmyz. Erjan reseilik kompozitor Igor Krýtoidyń akademiiasynda bilim alýda. Ázirge, jaǵdai solai.
- «Junior Eurovision Song Contest 2019» halyqaralyq án baiqaýyna óz eliniń atynan qatysýǵa usynys túskende, Erjan birden kelisimin berdi me?
- Joq, Erjan birden kelisimin bergen joq. Biraz oilandy. Sebebi ondaǵy úlken jaýapkershiliktiń júgin sezdi, bildi.Reseide bolǵan «Golos Deti» jobasynyń sońynda oryn alǵan úlken kelispeýshilikten, daý-damaidan keiin birden osyndai usynys túsken kezde, otbasymyzben oilandyq, aqyldastyq. Endi usynys jasalǵan eken, bul kezeńnen de ótip kóreiik dep sheshtik. Sodan kelisimimizdi berdik.
- Óner joly – aýyr dep jatady. Sondyqtan da bolar, bir sát Erjannyń bala ekenin umytyp ketemiz bárimiz. Bala bolyp bir sát oinaidy ma ózi? Ýaqyty bar ma oǵan?
- Durys aitasyz, óner joly óte qatal,óte aýyr jol. Minezine de áserin tigizip jatady. Sondyqtan árdaiym onyń aldyn alýǵa tyrysyp jatamyz. Árine bala bolyp oinaǵysy keledi. Ákesi ekeýmiz oinatýǵa aparyp ta turamyz, qalaǵan zattaryn alyp berip turamyz. Barlyǵyna úlgerýge tyrysyp júremiz. Ras bala bolyp oinaýǵa ýaqyty bola bermeidi. Biraq onyń ornyn toltyrýǵa tyrysamyz.
- Erjannyń kópshilikke óte salmaqty, sabyrly bolyp kórinetini jasyryn emes. Baiqaý aldyndaǵy ishki qobaljýy bar ma? Sizben bólise me?
- Erjan óte emotsiiaǵa berik, óte sezimtal dep aitsam bolady. Ózine artylǵan jaýapkershilikti túsinip júr. Ol bundai jaýapkershilikti burynnan da túsinetin bala. Óitkeni talai baiqaýlarǵa qatysyp júr. Biraq bul jolǵy búkil álem kóz tigip otyrǵan baiqaýdyń júginiń erek ekenin uǵynyp júr. Ishki qobaljýy, tolqynysymen menimen únemi bólisip otyrady. Ózimniń mamandyǵym psiholog bolǵandyqtan, ol jaǵynan balammen únemi ashyq áńgimeler júrgizip otyrýǵa tyrysamyn.
- Erjan Maksimniń anasy bolý ońai ma?! Qazirgi onyń suranysqa ie ánshiler qatarynda bolýyna orai týyndap otyr bul suraǵym..
- Erjan Maksimniń anasy bolý – ońai dep aita almaimyn. Óitkeni qiyn jaǵdailar da bolyp turady. Óitkeni men tek Erjan Maksimniń anasy emes, sonymen qatar qazirgi tańda prodiýserlik jumystardy da atqaryp júrmin. Balamnyń jaǵdaiyn jasaý, onyń grafigin toltyryp otyrý, aldaǵy bolatyn sharalardy josparlaý - osynyń barlyǵy keide qiyndyq týǵyzady. Mineki, aldyda kele jatqan úlken jaýapkershilik tur. Soǵan balany psihologiialyq turǵyda daiyndaý, osynyń barlyǵy meniń moinymda. Sebebi men tek qana Erjannyń anasy emes, qoldaýshysy da, jaqyny da,janashyry da, syrlasy da, prodiýseri de bolýǵa tyrysamyn.
- Erjan Maksim qazir neni armandaidy?
- Balamnyń qazirgi armany - «Junior Eurovision Song Contest 2019» baiqaýynan jeńispen oralý. Al jalpy ómirde armandary kóp, sonyń biri – álemdik juldyz bolý, osy qazaq eliniń atyn dúnie júzine pash etý. Bolashaqta úlken mýzykalyq, prodsiýserlik ortalyqtar ashý siiaqty, taǵysyn taǵy úlken armandary bar.
- Al anasynyń armany qandai eken?
- Al endi meniń armanym – osy balam maqsatyna jetse eken deimin. Meniń odan asqan armanym joq.Til-kózden aman bolyp, balam osylai qazaqtyń atyn álemde abyroimen qorǵap júrse eken deimin. Ákesi ekeýmiz árdaiym óz balamyzǵa senemiz, úlken senim bildiremiz. Bul baiqaýda da óz ánin jaqsy oryndap shyǵady dep oilaimyz. Qazaqstandyqtar da, alys-jaqyn shet elderdegi Erjantaiymnyń tyńdarmandary da qoldaý bildirip, belsendi túrde daýys beredi dep úmittenemiz. Ózgeler syndy biz de, balamyzdan birinshi oryndy, jeńisti kútemiz.
Aita keterligi, Qazaqstan 2019 jyldyń 24 qarashasynda Glivitse qalasy, Polshada ótetin halyqaralyq «Junior Eurovision Song Contest», án baiqaýyna ekinshi ret qatysady. 9 jastan bastap 14 jasqa deiingi ánshiler qatysatyn «Eurovision» analogynda elimizdi Erjan Maksim tanystyrady. Qazaqstannyń aýmaǵynda baiqaýdy «Habar» telearnasy transliatsiialaityn bolady. «Habar» Agenttigi 2016 jylǵy 1 qańtardan bastap is-sharany uiymdastyratyn Eýropalyq habar taratý odaǵynyń (EBU) qaýymdasqan múshesi, bul múshelik atalǵan baiqaýǵa qatysý úshin elden úmitker usynýǵa múmkindik berdi.
