Qazaqstandyq ánshi, «Golos. Deti» baiqaýynyń altynshy kezeńiniń jeńimpazy Erjan Maksim ózge qatysýshylarmen qarym-qatynasy jóninde aityp berdi, dep habarlaidy QazAqparat tilshisi.
«Kastingke kelgen sátten finalǵa deiin bárimiz dos bolyp keldik, birge oinadyq, birge daiyndaldyq. Birge án aittyq, qazir de dos bolyp qaldyq. Jalpy «Golos. Deti» baiqaýy qatty unady. Arasynda qiynshylyqtan da ótip turý kerek», - dedi Erjan Makism elordada balalar úiinde ótken kezdesýde.
Sonymen birge, jas ánshiniń anasy Gúlmira Álibek Erjan túsken atyshýly jarnamany túsindirip berdi.
«Ótkende qurylys kompaniiasynyń jarnamasyna tústik. Stsenarii boiynsha, Erjan birinshi qabattaǵy qyzǵa ǵashyq bolyp, sol qabattan páter suraidy. Biraq, ondaǵy páterler satylyp ketken. Osynyń bárin adamdar Birinshi arnaǵa burmalap, repost jasap ketti. Jarnamanyń Birinshi arnaǵa esh qatysy joq. Bizdiń arnany ájýalaityn oiymyz da bolmady. Eshkimdi kinálamaimyz, eshkimge aiyp joq. Bári jaqsy», - dedi G. Álibek.
Ánshiniń anasy Erjan men Mikella Abramovanyń «Jańa tolqyn» balalar baiqaýynyń ashylýynda án shyrqaǵanyn atap ótti.
«Erjan men Mikellany qarsylas, biriniń ornyn biri tartyp aldy degen qaýeset bar. Mundai áńgimeniń balalarǵa qatysy bolmaýy kerek. Balalar shyǵarmashylyq ómirde birge, tatý-tátti dos. Balalardyń esh kinási joq. Olar tek qana óz arman-maqsattaryna umtyla berýi kerek. «Jańa tolqyndaǵy» dýetti kórermen óte jaqsy qabyldady, án aityp bolan soń 5 minýt boiy «Molodtsy!» dep qoshemettedi. Sonda ózimizdi baqytty sezindik», - dedi Erjannyń anasy.
Olardyń aitýynsha, 28 maýsymda elordada ótetin Erjannyń jeke kontsertine Mikella Abramovanyń qatysýy boiynsha kelissózder júrip jatyr. Odan bólek, Sáken Maiǵaziev, Ulyqpan Joldasov, Renat Ǵaisin, Móldir Áýelbekova, Aiqyn Tólepbergen syndy belgili ánshiler kesh qonaqtary bolmaq.
Buǵan deiin Erjan Maksim Reseidiń Birinshi arnasynyń «Golos. Deti» konkýrsynyń jeńimpazy atanǵan edi.
