Belgili qazaqstandyq ánshi, «Golos. Deti» baiqaýynyń altynshy kezeńiniń jeńimpazy Erjan Maksim elordada balalar úilerine baryp, óz kontsertine tegin bilet taratty, dep habarlaidy QazAqparat tilshisi.
Astanalyq balalar úiinde 66 bala, SOS-balalar aýylynda - 50 bala tárbielenip jatyr.
«Men sizderdi óz kontsertime shaqyrý úshin arnaiy keldim. Syilyqqa balmuzdaq ákeldim. Barshańyzdy alǵashqy kontsertime shaqyramyn», - dedi ánshi.
Ánshi «Golos. Deti» baiqaýyna qalai qatysqanyn, V. Meladzemen qalai jumys istegenin, bos ýaqytynda nemen ainalysatynyn aityp berdi.
Balalar ánshige óz suraqtaryn qoiyp, estelikke fotosýretke tústi.
Aita keteiik, Erjan Maksim elordada óziniń alǵashqy jeke kontsertin beredi. Kontsert 28 maýsym kúni «Qazaqstan» ortalyq kontsert zalynda ótedi. Sáken Maiǵaziev, Ulyqpan Joldasov, Renat Ǵaisin, Móldir Áýelbekova, Aiqyn Tólepbergen syndy belgili ánshiler kesh qonaqtary bolmaq.
Buǵan deiin Erjan Maksim Reseidiń Birinshi arnasynyń «Golos. Deti» konkýrsynyń jeńimpazy atanǵan edi.
