Mádeniet jáne sport ministri Arystanbek Muhamediuly Reseidegi «Golos. Deti» baiqaýynyń jeńimpazyn qabyldap, tilshiler úshin baspasóz máslihatyn ótkizdi, dep habarlaidy QazAqparat.
«Bizde qazirgi kezde maqtanyshpen aitý kerek - ónerpaz jastarymyz kóbeiip keledi. Jaqyn arada AQSh-taǵy eń myqty «The World's Best» baiqaýynda Daneliia Tóleshova keremet óner kórsetip, Dimash Qudaibergen finalǵa shyǵyp, óz jolyn Daneliiaǵa bergen bolatyn. Ondai jetistikter kóp. Sonyń jalǵasy retinde - bizdiń baýyrymyz Reseidegi «Golos. Deti» baiqaýynda joǵary oryn ielendi. Ol - úlken jetistik. Bizde - osyǵan deiin jastarymyz mundai baiqaýlarǵa shyqqanymen, finalǵa jete bermeitin. Biraq, bizdiń Erjan sýperfinalǵa shyǵyp, ekinshi oryn ielenip otyr.
Ár konkýrstyń ereksheligi bar. Bizde úlken jetistikter jeterlik. Árine, ekinshi oryn emes, Erjannyń birinshi oryn alǵanyn bárimiz qalaimyz. Biraq, bizde basqa da konkýrstarǵa qatysyp jatqan qatysýshylar bar. Mysaly, vokaldan Saltanat Ahmetova Reseidegi «Bolshoi proekt» degen konkýrsta operadan gran-pri aldy. Sol sekildi, Bahtiiar Adamjanov degen bishi jigit jylyna eki-úsh konkýrsqa baryp, mindetti túrde gran-pri ákelip júr. Jaqyn arada Italiiadaǵy úlken baiqaýda álemniń eń úzdik 15 bishisi shaqyryldy. Sonda Bahtiiar taǵy da birinshi boldy. Sol sekildi, Erjannyń ekinshi orny de óte joǵary jetistik», - dedi ministr.
Ministr jiyn barysynda Erjanǵa syilyq tabys etti. Arystanbek Muhamediuly QHA kontsertinde óner kórsetetinin, Álibek Dinishevten keiin án shyrqaitynyn habarlady.
«Konkýrstan keiin kóp nárse ózgerdi. Buryn meni Oral halqy ǵana tanityn. Endi Qazaqstannyń jartysy tanidy dep oilaimyn. Qazirgi ýaqytta Instagramdaǵy jazylýshym kóbeiip keledi. Qoldap jatqandaryńyzǵa kóp rahmet!
Birinshi oryn almaǵanym úshin eshkimge ókpelemeimin. Bir jaǵynan, birinshi oryn almaǵanym da jaqsy boldy. Eger men baiqaýda birinshi oryn alsam, bári meni quttyqtaityn edi. Endi ekinshi oryn alsam da, ártister tanyp, áleýmettik jelide oqyrmandarym kóbeidi», - deidi Erjannyń ózi.
Erjannyń atasynyń aty Maqsym bolǵan eken. Alaida qujat boiynsha Maqsym Maksim bolyp ózgerip ketken.
«Dimash aǵamdai bolsam deimin. Dimash aǵama rahmet aitamyn. Alla Pýgacheva apamyzben kezdeserde Dimash aǵam videoqońyraýmen maǵan habarlasyp, quttyqtaýlaryn aityp jatyr. Reseide «Spasibo» dep úirenip qalyppyn. Dimash aǵam maǵan «Qazaqsha sóile» dep eskertip, kúldi», - deidi Erjan Maksim.
Eske sala ketsek, birneshe kún buryn Reseidiń birinshi arnasynyń «Golos. Deti» konkýrsynyń sýperfinalynda Erjan Maksim án shyrqap, ekinshi oryn ielengen bolatyn.
Alaida kóp ótpei «Golos. Deti» konkýrsynyń qorytyndysyna bailanysty daý týyndady. RBK málimetine qaraǵanda, Reseidiń birinshi arnasy ánshi Alsý men bankir Ian Abramovtyń on jasar qyzy Mikella Abramova jeńimpaz dep tanylǵan finaldaǵy daýys berý qorytyndysyna bailanysty tekserý júrgizbekshi.
Daýys berý qorytyndysy shyqqannan keiin túrli elderdiń kóptegen kórermenderi narazylyq bildirip, qaita esepteýdi talap etti. Ataqty shoýmen Maksim Galkin de Instagramdaǵy paraqshasyna video júktep, óz pikirin bildirdi.
