Air Astana kompaniiasy kúzgi-qysqy navigatsiia kezeńinde halyqaralyq reisterdi keibir ózgeristermen jalǵastyrady, dep habarlaidy QazAqparat tilshisi.
«2020 jyldyń 21 qazanynan bastap QR Densaýlyq saqtaý ministrliginiń tapsyrmasyna sáikes Air Astana Túrkiia, BAÁ, Ýkraina jáne Germaniiaǵa halyqaralyq reister sanyn azaitady. Osylaisha, Ystambulǵa ushýdyń aptalyq jiiligi 16-dan 12-ge, Dýbaiǵa - 12-den 8-ge, Kievke - 3-ten 1-ge, Frankfýrtqa - 6-dan 4 reiske deiin tómendeidi. Áýe kompaniiasy Sharm-El-Sheih pen Maldiv araldaryna charterlik reister jasamaq. Ishki reister kestesi ózgerissiz qalady», - dep habarlaidy kompaniiadan.
Áýe kompaniiasynyń prezidenti Piter Foster álem elderiniń úkimetteriniń virýstyń taralýyn toqtatýǵa arnalǵan áreketterin qoldaitynyn jetkizdi.
«Saiahattaý, týristik jáne rekreatsiialyq indýstriia - bul álemdik ekonomikalyq qyzmet pen jumys oryndary ulǵaiýynyń qýatty generatory. Bul salalardyń 2021 jyldyń basynda tolyǵymen jandanýy óte mańyzdy, áitpese qarjylyq jáne áleýmettik saldary ulttyq ekonomika úshin de, adamdardyń ómiri úshin de óte aýyr bolady. IATA men biz tolyq múshe bolǵan Asia Pacific Airlines qaýymdastyǵynyń (AAPA) hattamalaryna sáikes halyqaralyq reistermen ushpaq jolaýshylardy COVID-19 anyqtaityn testileý osyndai qaita iske qosýy úshin mańyzdy dep sanaimyz», - deidi ol.
IATA zertteýlerine sáikes, ushaq salony koronavirýs infektsiiasyna qarsy basqa qoǵamdyq oryndarmen salystyrǵanda eń qaýipsiz. Al PTR testileri men borttyq maskalar infektsiianyń taralýymen kúresýdiń tiimdi ádisteri. Sonymen, 2020 jyldyń basynan bastap tasymaldaý kezinde infektsiianyń 44 oqiǵasy tirkelgen. Osy kezeńde 1,2 mlrd jolaýshynyń tasymaldanǵanyna qaramastan, bul ortasha eseppen 27 mln jolaýshyǵa 1 oqiǵa.
Eske sala ketsek buǵan deiin Úkimet janyndaǵy vedomstvoaralyq komissiianyń sheshimine sáikes, el óńirlerindegi shekaradan ótkizý pýnkterinde sanitarlyq-epidemiologiialyq baqylaý kúsheitiletini habarlanǵan bolatyn. Komissiia sheshimine sáikes Qazaqstan koronavirýsqa qatysty ahýaly nashar elderge áýe reisterin qysqartady.
