QR Qorǵanys ministri Nurlan Ermekbaev Arystaǵy qazirgi jaǵdai týraly baspasóz máslihatyn ótkizdi, dep habarlaidy QazAqparat tilshisi.
«Qazirgi ýaqytta quqyq qorǵaý organdary tergeý júrgizip jatyr. Barlyq yqtimal nusqalar qarastyrylýda. Adami faktor bolýy múmkin, órt qaýipsizdigi talaptarynyń buzylýy nemese elektr symynyń qysqa tuiyqtalýy, himiialyq reaktsiia syndy tehnikalyq sebepter, tipti qasaqana órt qoiylǵan bolýy múmkin», - dedi ministr Ortalyq kommýnikatsiialar qyzmetinde ótken baspasóz máslihatynda.
Sonymen birge, ministr jaýapkershilikten qashpaitynyn jetkizdi.
«Jeke ózim qorǵanys vedomstvosynyń basshysy retinde «Memlekettik qyzmet týraly» QR Zańyna sáikes, 2018 jyldyń 7 tamyzynda osy laýazymǵa taǵaiyndalǵan sátten bastap, Qarýly Kúshterde bolǵan barlyq jaǵdaiǵa jaýap berip kelemin. Bul jaýapkershilikten qashqan emespin jáne qazir de qashýǵa tyryspaimyn. Tergeý nátijesinde anyqtalǵan kináliler zań júzinde jaýapqa tartylady», - dedi N. Ermekbaev.
