Qazaqstan Respýblikasynyń Qorǵanys ministri Nurlan Ermekbaev arnaýly jiyn kezinde áskeri mindetti adamdar áskeri qyzmetker mártebesine jáne zańǵa sáikes áleýmettik sipattaǵy jeńildikterdiń bárine ie bolatynyn málimdedi, dep habarlaidy QazAqparat.
«Atap aitqanda olar tamaqpen, zattai, meditsinalyq kómekpen qamtylady. Sondai-aq áskeri mindettilerdiń arnaýly jiyn kezinde jumys orny, laýazymy saqtalady. Memleket esebinen jumys ornyndaǵy ailyǵy tólense, jumys istemeitin azamattarǵa eń tómengi ailyq mólsheri (42 500 teńge) beriledi. Máselen arnaýly jiynǵa shaqyrylǵanǵa deiin áskeri qyzmetshiniń ailyǵy 200 myń teńge bolsa, jiynnyń ár aiynda ol osy somany alyp otyrady», - dedi Nurlan Ermekbaev OKQ-da ótken baspasóz máslihatynda.
Qorǵanys ministri sondai-aq arnaýly jiyndardy jumyldyrýmen (mobilizatsiia) shatastyrmaý kerektigin eskertti.
«Jumyldyrý – memlekettiń barlyq salasyn, halqyn, uiymdardy, áskeri qurylymdardy áskeri ýaqyt rejimine ótkizý degendi bildiredi. Qazir bul týraly aitylyp otyrǵan joq. Arnaýly jiyndar árdaiym jylyna birneshe ret ótkiziledi. Aimaqtardaǵy ákimniń bárinde de osyndai jiyn ótkizý tájiribesi barshylyq. Ákimder densaýlyq jáne otbasylyq jaǵdaiyn eskere otyryp, qorǵanys isteri jónindegi bólimder men áskeri komitetter arqyly azamattardy shaqyrady. Biz óz tarapymyzdan ózdigimen arnaýly jiynǵa kelgisi kelgenderge basymdyq berýge keńes beremiz. Tótenshe jaǵdaidyń engizilýine bailanysty eldegi qiyndyqty eńserý úshin úles qosqysy keletin ótinimder molynan túsip jatyr. Jastarymyz patriot. Jarlyq shyqqannan keiin keshe keshten beri arnaýly jiynǵa kelgisi keletin jastardan ótinim kóptep túsýde», - dedi ol.
Eske sala ketsek, keshe Qazaqstan Prezidenti áskeri mindettilerdi arnaýly jiynǵa shaqyrý týraly Jarlyq shyǵarǵan edi.
