L.Gýmilev atyndaǵy Eýraziia ulttyq ýniversitetiniń rektory, Tarihshylardyń ulttyq kongresi basqarmasynyń tóraǵasy, QR UǴA akademigi Erlan Sydyqov ult tarihyn túgendeýde óz pikirimen bólisti, dep habarlaidy QazAqparat.
«Keshe ǵana Qazaqstan Prezidenti Qasym-Jomart Kemeluly ózi zertteýge bastama usynys jasaǵan Joshy tulǵasy jáne onyń ulysynyń tarihy - Uly dalanyń jasampaz tarihymen óte tyǵyz astasyp jatyr. Qazaq handyǵy dáýirimen maqtanatyn da sonymen qatar, qaperimizge toqyp alyp, saqtyq jasaityn jaqtarymyz da bar. Qazaq handyǵynyń 550 jyldyǵy ótken tarihtaǵy memlekettigimizdi zerdeleýge, odan sabaq alýǵa jeteledi. Biraq biz tek Qazaq handyǵy dáýirimen ǵana shektelip qalmaýymyz kerek. Ony osynda otyrǵan tarihshylar qaýymy jaqsy túsinedi degen pikirdemin. Bizdiń odan arǵy tarihymyz bar. Ol tarih – asa bai, jasampaz tarih. Ótken tarihty bilmei búgingini durys jolǵa sala almas edik. Búginimizdi qadyr tutpasaq, erteńniń de baiandy bolýy ekitalai», - dedi Erlan Sydyqov elordada ótken «Joshy ulysy tarihynyń máseleleri» VII tarihshylarynyń ulttyq kongresinde.
EUÝ rektorynyń aitýynsha, Memleket basshysynyń: «Ulttyq ideianyń tujyrymy ulttyq tarihi keńistikte jatyr» degen sózin de esten shyǵarmaý kerek. Osynaý ǵasyrlar qoinaýynan búginge deiin jol tartqan rýhani qazynany – «tól tarihty» qoǵamymyz memleket múddesimen birlikte qarastyrǵan abzal.
«Otandyq tarihtaǵy negizgi oqiǵalardyń mazmuny týraly ǵylymi dáleldengen faktiler negizinde mindetti tolyq bilim berý tarihshylardyń basty qyzmeti dep sanaimyn. Tarihi-mádeni damýdyń úzdiksizdigi men sabaqtastyǵyn dáleldi kórsetý gýmanitarlyq sala ókilderiniń ult aldyndaǵy basty mindeti dep bilemin. Rýhani muragerliktiń tereń tamyrlaryn, burynǵy urpaqtyń qajyrly eńbegin, halyqtyń jeke tulǵalaryn, tarihi tájiribeni jáne ulttyq dástúrlerdi qurmetteitin jastardyń ustanymyn qalyptastyrý – búgingi birtutas qoǵamymyzdyń ólsheýsiz paryzy bolmaq. Qoǵamǵa yqpal etýshi, ári memleketimizdiń ziiatker áleýetin qalyptastyrýshy jáne jańa ideialardy beretin de ult tarihy ekendigi aqiqat shyndyq», - dedi ol.
