«Ádilet» partiiasynyń Quryltaidaǵy fraktsiiasy soltústik jáne shyǵys óńirlerdi gazdandyrý máselesin kóterip, Energetika ministrligine depýtattyq saýal joldady, dep habarlaidy ult.kz.
Depýtat Erlan Saiyrdyń ministr Erlan Aqkenjenovke joldaǵan saýalynda Soltústik Qazaqstan, Aqmola, Pavlodar, Abai jáne Shyǵys Qazaqstan oblystaryn gazben qamtamasyz etý máselesi sóz bolǵan.
Depýtattyń aitýynsha, Memleket basshysy Qazaqstannyń soltústik jáne shyǵys óńirlerin tabiǵi gazben qamtýdy strategiialyq mindet retinde belgilegen. Al Úkimet 2036 jylǵa qarai eldegi gazdandyrý deńgeiin 80 paiyzǵa jetkizýdi josparlap otyr.
Sailaý aldyndaǵy kezdesýlerde atalǵan oblystardyń turǵyndary «Ádilet» partiiasy ókilderine óńirlerdi gazdandyrý máselesin birneshe ret kótergen.
Sonymen qatar 2026 jyly soltústik baǵyt boiynsha «Esil – Astana» magistraldyq gaz qubyrynyń jeke jobasy ázirlenip jatqany aityldy. Joba Petropavl, Kókshetaý jáne Astanany gazben qamtamasyz etýge baǵyttalǵan.
Alaida depýtat Pavlodar, Abai jáne Shyǵys Qazaqstan oblystaryn gazben qamtýdyń naqtylanǵan modeli ázirge ashyq kózderde usynylmaǵanyn atap ótti.
Saýalda ministrlikke úsh negizgi másele boiynsha túsinikteme berý usynyldy. Atap aitqanda, «Esil – Astana» jobasy iske qosylǵannan keiin soltústik-shyǵys óńirlerdi gazdandyrýdyń biryńǵai modeli saqtala ma, Pavlodar, Abai jáne Shyǵys Qazaqstan oblystary úshin qandai stsenarii qarastyrylyp otyr jáne bul óńirler gazdandyrý deńgeiin 80 paiyzǵa jetkizý jónindegi Jol kartasyna jeke engizile me degen suraqtar qoiyldy.
«Ádilet» fraktsiiasy soltústik-shyǵys ekonomikalyq aimaǵyn gazdandyrýdy jedeldetýdi, gaz qubyrlaryn tartýǵa memlekettik-jekeshelik áriptestik pen jeke investitsiialardy tartýdy, sondai-aq ishki gaz kózderin izdeýdi kúsheitýdi usyndy.
Sonymen qatar partiia halyqqa gazdandyrý máselesiniń sheshilý tetikteri men merzimderi týraly túsindirý jumystaryn júieli júrgizý qajet dep sanaidy.
