Ákim sailaýy ótken aýyldardyń kóbinde naýqan aldynda ózindik «praimeriz» ótken. Májilis depýtaty, Ulttyq qoǵamdyq senim keńesiniń múshesi Erlan Sairov keshegi ótken sailaýdan osyndai oi túiip qaitqan, dep habarlaidy QazAqparat.
«Bul bizdiń elimizdiń saiasi tarihyndaǵy úlken bir beles dep aitýǵa úlken negiz bar. 30 jyldyń ishinde Qazaqstan halqy óziniń ákimderin tikelei sailap alý quqyǵyna ie bolyp otyr. Bul birinshiden, halqymyzdyń saiasi mádenietin ósirýge alyp keledi. Ekinshiden, aimaqtarda saiasi pliýralizmniń damýyna óte tereń irgetes qalaityny anyq. 15 kúndei aimaqtardy aralap qaittyq. Sol kezde aýyl ákimderin sailaý protsesine jan-jaqty saraptama jasadyq. Halyqtyń qyzyǵýshyly óte joǵary. Shynyn aitý kerek, qazaq óz taǵdyryna kelgende óte jaýapty qaraidy», - deidi depýtat.
Ulttyq keńes múshesi mundai qyzyǵýshylyq, meniń oiymsha, tipti Parlament sailaýy kezinde de bolmaǵanyn aitady.
«Óitkeni aýyl azamattary ákimge daýys berý arqyly óziniń bolashaǵyn, aýyldyń damý jolyn sailaitynyn túsingendikten, bul naýqanǵa óte jaýapty keldi. Sonymen birge, kandidattarǵa degen nazary da erekshe boldy. Meniń túsingenim, óz ishterinen kandidat usynbas buryn árbir aýylda ózinshe bir praimeriz bolǵan. Iaǵni, kim laiyqty degen máseleden bastaǵan sailaýǵa jumylýdy. Laiyqty adamdardyń ishinde de suryptaý bolǵan. Qazir aityp jatyrmyz ǵoi, 2 298 kandidat boldy dep. Negizinde kandidattardyń tizimi 5-6 myńnan da asqan. Sonyń ishinde iriktelgenderi ǵana tirkeýge qatysqan», - deidi Májilis ókili.
Erlan Sairov osy sailaýda aýyl halqynyń jastarǵa úmit artatynyn airyqsha baiqaǵanyn aitady.
«Taǵy bir ereksheligi, sailaýshylardyń ózderi jastarǵa oryn berýimiz kerek degen talapty alǵa tartty. Meni sol tańǵaldyrdy. Iaǵni, halyqtyń ózi jastar istesin degen talap qoiyp, shek belgiliep tastaǵan. Bul esh jerde jazylǵan zań bolmasa da, ishki ustanymdaryn osylai qalyptastyrǵan. Mysaly, keshe men Mańǵystaý oblysynyń Túpqaraǵan aýdanyndaǵy Aqshuńqyr aýylynda boldym. Sol jerdegi úmitker Erkebulan degen jigit 32-de eken. Onyń basty maqsaty – Aqshuńqyr aýylynyń infraqurylymyn janyndaǵy Aqtaýdyń deńgeiine jetkizý. Meniń oiymsha, osy sailaýdan keiin aýyl ákimderiniń jasy biraz jasarady», - deidi sarapshy.
