«Serpin» baǵdarlamasy boiynsha keler jyldan bastap magistratýrada bilim alýǵa granttar bólinedi. Bul týraly búgin elimizdiń Bilim jáne ǵylym ministri Ońtústik Qazaqstan oblysynda Premer-Ministr Baqytjan Saǵyntaevtyń tóraǵalyǵymen ótken keńeste málim etti, dep habarlaidy QazAqparat tilshisi.
Ministr Erlan Saǵadievtiń sózinshe, qazir «Serpin» baǵdarlamasymen bilim alǵan jastardy soltústik oblystarda qaldyrý qiynǵa soǵýda. Sondyqtan oqý oryndaryn bitirgender úshin jaǵdai jasaý kerektigi atap ótildi.
«Bul másele boiynsha birqatar problema bar. Jas balalardy jibersek kolledjderdi bitirip, qalmai, úilerine qaityp ketedi. Sondyqtan «Serpin» baǵdarlamasymen jumys isteýge daiyn, túsinikteri mol jastardy oqýǵa jiberse durys bolar edi. Sodan keiin kezeń-kezeńimen grant bóletin bolamyz. Kelesi jyly bakalavriatty bitirgen jastarǵa magistratýrada oqýǵa grant bólemiz», - dedi Bilim jáne ǵylym ministri.
Bul másele boiynsha Baqytjan Saǵyntaev soltústik óńirlerinen kelgen ákimdik ókilderine jastarǵa jaǵdai jasaý jaǵyn qarastyrý qajettigin atap ótti. Sebebi oqý bitirgen soń turaqtaityn jeri joq stýdentter kóbine óz aýyldaryna qaitýǵa májbúr bolady.
«Búgingi kúnde jastarǵa soltústik oblystaryna baryńdar deimiz. Ol barady, oqidy. Tamaǵyn ishedi, jatady. Eki-úsh jyl júrgennen keiin turaqtaityn jeri joq. Ne jumys, ne turaqtaityn aǵaiyn-týys joq. Aýylyn saǵynady da qaityp keledi. Biren-sarany qalar, biraq negizinen qaityp ketedi. Eki-úsh jyldyń ishinde ol kishkene mamandyq aldy, beiimdeldi. Al biraq, degenmen de, júregi qaita tartyp turady», - dedi Úkimet basshysy.
