Bilim jáne ǵylym ministri Erlan Saǵadiev OQO-da zorlandy degen jeti jasar balanyń isine qatysty pikir bildirdi, dep habarlaidy Sputnik Qazaqstan.
"Qazir tergeý júrip jatyr. Meniń oiymsha, ár bes minýt saiyn shyǵyp, interviý berýdiń qajeti joq. Tergeý qorytyndysyn kúteiik. Biz prokýratýra, ishki ister basqarmasymen konsýltatsiia júrgizdik. Ázirge tergeý júrip jatyr. Men sizderdi de balanyń múddesi úshin osy suraq boiynsha qosymsha túsiniktemelerden bas tartýǵa shaqyramyn", — dedi Saǵadiev jýrnalisterge májiliste ótken úkimet saǵatynan keiin.
Ministr balanyń qaýipsizdigi qamtamasyz etilgenin, kóp adam osy máselemen ainalysyp jatqanyn aitty.
"Mektep ákimshiligine bailanysty qandai shara qoldanylady?", — dep surady BAQ ókilderi.
"Tergeý qorytyndysy, saraptama nátijesi shyqqan kezde, qandai da bir faktiler rastalsa, biz eń qatań shara qoldanamyz", — dep málim etti ol.
Budan bólek, ministr tergeý aiaqtalǵasyn, OQO mektepterinde keshendi tekseris júrgiziletinin alǵa tartty.
Ministr "bizdiń balalar mektepte qorǵalǵan dep esepteisiz be?" degen suraqqa:
"Mundai faktiler bolady. Sáýir aiynyń basynda Almatyda barlyq úkimettik emes uiym ókilderimen kezdesý ótkizýdi josparlap otyrmyz. Biz Arýjan Saiyndy, basqalaryn da osy jiynǵa shaqyramyz. Osyndai faktilerdiń bolý múmkindigin azaitý úshin memleket pen qoǵam tarapynan qolǵa alynýy tiis qosymsha sharalardy talqylaimyz", — dep jaýap berdi.
