Vitse-prezident Erlan Qarin Mańǵystaý oblysynda oqý-jattyǵý kezinde qaza tapqan áskeri qyzmetshilerge qatysty qabyldanǵan sharalar týraly jazdy, dep habarlaidy ult.kz.
Onyń aitýynsha, Kaspiidegi qaiǵyly jaǵdai jalpyulttyq qasiretke ainaldy. Memleket basshysy Qasym-Jomart Toqaev zardap shekkenderge kómek kórsetý jáne oqiǵanyń mán-jaiyn jan-jaqty ári obektivti tergeý máselelerin jeke baqylaýyna alǵan.
Prezidenttiń Jarlyǵymen oqý-jattyǵý kezinde qaza tapqan 14 áskeri qyzmetshi «Aibyn» ordenimen marapattaldy. Sondai-aq Úkimettik komissiia qurylyp, oqiǵa ornyna jiberildi. Qaza tapqandardyń otbasylary men zardap shekken áskeri qyzmetshilerge qajetti kómek kórsetý tapsyryldy.
Quqyq qorǵaý organdary qaiǵyly oqiǵanyń sebepteri men mán-jailaryn anyqtaý úshin qylmystyq is qozǵaǵan. Úkimettik komissiianyń habarlaýynsha, tergeý aiasynda vedomstvoaralyq jedel-tergeý toby qurylyp, qajetti saraptamalar taǵaiyndalǵan.
Qarinniń jazýynsha, Qorǵanys ministrliginiń birqatar laýazymdy tulǵasy kúdikti retinde ustalǵan. Qazirgi ýaqytta tergeý amaldary jalǵasyp jatyr.
Sonymen qatar qaza tapqan áskeri qyzmetshilerdiń otbasylaryna qoldaý kórsetý úshin arnaiy qor qurylyp, qaiyrymdylyq qarajatyn jinaý jumysy bastalǵan. Onyń qarajatyn ádil ári ashyq bólý úshin Qazaqstan Halyq Keńesiniń múshesi Bekmurat Júsipov basqaratyn qoǵamdyq komissiia jasaqtalǵan.
Erlan Qarin Memleket basshysy Qorǵanys ministrliginiń jańa basshysyn taǵaiyndap, vedomstvo jumysyn keshendi tekserý jónindegi komissiia qurǵanyn atap ótti. Komissiiaǵa qarjy jáne áskeri bólimderdiń materialdyq-tehnikalyq qamtamasyz etilý jaǵdaiyna aýdit júrgizý tapsyrylǵan. Al onyń alǵashqy qorytyndysy jeti kún ishinde baiandalýǵa tiis.
Budan bólek, Prezident on kún ishinde armiiany reformalaýdyń arnaiy josparyn ázirleýdi tapsyrǵan. Reformanyń negizgi maqsaty – áskeri qyzmetshilerdiń qaýipsizdigi men ómirin basty basymdyqqa ainaldyratyn jańa úlgidegi armiia qurý.
«Eń bastysy, memleket tek jedel áreket etip qana qoimai, oqiǵalardyń túpki sebepterin joiýǵa baǵyttalǵan júieli ári keshendi sheshimderdi qabyldaýda», – dep jazdy Erlan Qarin.
