ۆيتسە-پرەزيدەنت ەرلان قارين ماڭعىستاۋ وبلىسىندا وقۋ-جاتتىعۋ كەزٸندە قازا تاپقان ەسكەري قىزمەتشٸلەرگە قاتىستى قابىلدانعان شارالار تۋرالى جازدى, دەپ حابارلايدى ult.kz.
ونىڭ ايتۋىنشا, كاسپييدەگٸ قايعىلى جاعداي جالپىۇلتتىق قاسٸرەتكە اينالدى. مەملەكەت باسشىسى قاسىم-جومارت توقاەۆ زارداپ شەككەندەرگە كٶمەك كٶرسەتۋ جەنە وقيعانىڭ مەن-جايىن جان-جاقتى ەرٸ وبەكتيۆتٸ تەرگەۋ مەسەلەلەرٸن جەكە باقىلاۋىنا العان.
پرەزيدەنتتٸڭ جارلىعىمەن وقۋ-جاتتىعۋ كەزٸندە قازا تاپقان 14 ەسكەري قىزمەتشٸ «ايبىن» وردەنٸمەن ماراپاتتالدى. سونداي-اق ٷكٸمەتتٸك كوميسسييا قۇرىلىپ, وقيعا ورنىنا جٸبەرٸلدٸ. قازا تاپقانداردىڭ وتباسىلارى مەن زارداپ شەككەن ەسكەري قىزمەتشٸلەرگە قاجەتتٸ كٶمەك كٶرسەتۋ تاپسىرىلدى.
قۇقىق قورعاۋ ورگاندارى قايعىلى وقيعانىڭ سەبەپتەرٸ مەن مەن-جايلارىن انىقتاۋ ٷشٸن قىلمىستىق ٸس قوزعاعان. ٷكٸمەتتٸك كوميسسييانىڭ حابارلاۋىنشا, تەرگەۋ اياسىندا ۆەدومستۆوارالىق جەدەل-تەرگەۋ توبى قۇرىلىپ, قاجەتتٸ ساراپتامالار تاعايىندالعان.
قاريننٸڭ جازۋىنشا, قورعانىس مينيسترلٸگٸنٸڭ بٸرقاتار لاۋازىمدى تۇلعاسى كٷدٸكتٸ رەتٸندە ۇستالعان. قازٸرگٸ ۋاقىتتا تەرگەۋ امالدارى جالعاسىپ جاتىر.
سونىمەن قاتار قازا تاپقان ەسكەري قىزمەتشٸلەردٸڭ وتباسىلارىنا قولداۋ كٶرسەتۋ ٷشٸن ارنايى قور قۇرىلىپ, قايىرىمدىلىق قاراجاتىن جيناۋ جۇمىسى باستالعان. ونىڭ قاراجاتىن ەدٸل ەرٸ اشىق بٶلۋ ٷشٸن قازاقستان حالىق كەڭەسٸنٸڭ مٷشەسٸ بەكمۇرات جٷسٸپوۆ باسقاراتىن قوعامدىق كوميسسييا جاساقتالعان.
ەرلان قارين مەملەكەت باسشىسى قورعانىس مينيسترلٸگٸنٸڭ جاڭا باسشىسىن تاعايىنداپ, ۆەدومستۆو جۇمىسىن كەشەندٸ تەكسەرۋ جٶنٸندەگٸ كوميسسييا قۇرعانىن اتاپ ٶتتٸ. كوميسسيياعا قارجى جەنە ەسكەري بٶلٸمدەردٸڭ ماتەريالدىق-تەحنيكالىق قامتاماسىز ەتٸلۋ جاعدايىنا اۋديت جٷرگٸزۋ تاپسىرىلعان. ال ونىڭ العاشقى قورىتىندىسى جەتٸ كٷن ٸشٸندە باياندالۋعا تيٸس.
بۇدان بٶلەك, پرەزيدەنت ون كٷن ٸشٸندە ارمييانى رەفورمالاۋدىڭ ارنايى جوسپارىن ەزٸرلەۋدٸ تاپسىرعان. رەفورمانىڭ نەگٸزگٸ ماقساتى – ەسكەري قىزمەتشٸلەردٸڭ قاۋٸپسٸزدٸگٸ مەن ٶمٸرٸن باستى باسىمدىققا اينالدىراتىن جاڭا ٷلگٸدەگٸ ارمييا قۇرۋ.
«ەڭ باستىسى, مەملەكەت تەك جەدەل ەرەكەت ەتٸپ قانا قويماي, وقيعالاردىڭ تٷپكٸ سەبەپتەرٸن جويۋعا باعىتتالعان جٷيەلٸ ەرٸ كەشەندٸ شەشٸمدەردٸ قابىلداۋدا», – دەپ جازدى ەرلان قارين.
