QR Densaýlyq saqtaý vitse-ministri – Bas memlekettik sanitar dáriger Erlan Qiiasov Parlament Májilisi men máslihattar depýtattaryn sailaýda koronavirýs infektsiiasynyń taralýynyń aldyn alý talaptaryn atady, dep habarlaidy "Ult aqparat".
«Daýys berýge arnalǵan nysanda áleýmettik araqashyqtyq saqtalýy tiis. Árbir sailaý ýchaskesinde: sailaý ýchaskesine kire beriste termometrmen kelýshilerdiń dene qyzýyn ólsheý; sailaýshylardyń júrý baǵytyn kórsetetin belgiler qoiý; sailaý komissiiasy músheleri 3 saǵat saiyn maska aýystyrýy tiis. Qoldy dezinfektsiialaýǵa arnalǵan sanitaizerler bolýy kerek. Kire beriste jáne shyǵa beriste paidalanylǵan jeke qorǵanys quraldaryn jinaýǵa arnalǵan konteiner bolýy qajet. Kelýshilerdiń dene qyzýy kóterilgen (37ºS joǵary) jaǵdaida, adamdy oqshaýlaýǵa arnalǵan jeke kabinet bolýy tiis», - dedi ol.
Onyń atap ótýinshe, baqylaýshylar men buqaralyq aqparat quraldary ókilderiniń ornalasqan jeri áleýmettik qashyqtyqty eskere otyryp, keminde 1,5-2 metr qashyqtyqta ornalasýy qajet. Sailaý komissiiasynyń múshelerine maska men qolǵap jetkilikti bolýy tiis. Ár 3 saǵat saiyn maska aýystyrylady. Keminde 1,5-2 metr áleýmettik araqashyqtyqty saqtaý, sailaý ýchaskesiniń jumysy bastalar aldynda jáne aiaqtalǵanda daýys berýge arnalǵan kabinalardy tazalaý kerek. Sailaý biýlletenderin taratqanda tikelei bailanys ornatýǵa bolmaidy.
«Epidemiologiialyq jaǵdaidy baǵalaý matritsasyna sáikes 2021 jylǵy 5 qańtardaǵy jaǵdai boiynsha táýekeli joǵary jáne ortasha aimaqtarda (qyzyl jáne sary aimaqta) bolǵan sailaý komissiiasynyń barlyq múshesi, baqylaýshylar, óńirlerdegi senimdi adamdar PTR ádisimen COVID-19-ǵa zerthanalyq tekserýden ótti», - dedi Erlan Qiiasov.
Vitse-ministrdiń aitýynsha, sailaýshylarǵa qajet bolǵan jaǵdaida jeke qorǵanys quraldary beriledi. Jáshikti sailaýshyǵa deiin nemese odan keiin dezinfektsiialaý qajet. Árbir sailaýshydan keiin tasymaldanatyn jáshik dezinfektsiialanady.
«Ýchaskelik komissiianyń daýys berý qorytyndylary týraly hattamalaryn qabyldaý kezinde qaýipsizdik sharalaryn qatań saqtaý qajet. Daýys berýge arnalǵan statsionarlyq jáne tasymaldanatyn jáshikterdi ashar aldynda dezinfektsiialaý mindetteledi», - dedi ol.
