Komsomoldyń qatarynda bolmadym. Alaida memlekettik saiasi qyzmetke aralasqaly beri, úsh komsomoldyqtyń qol astynda jumys istep, tárbiesin aldym. Memlekettik qyzmette júrgender biledi, komsomoldyqtar dep ataityn basshylardyń qasynda jumys isteý – eń bir azapty jumys, áskeri qyzmette júrgenmen birdei. Sebebi olar tym mazasyz basshylar – kúndiz-túni oilaityndary jumys. Senbi, jeksenbi, demalys degendi bilmeidi. Qashan tynyǵyp, kúsh jinaityndary da belgisiz.
Men jái qatardaǵy komsomoldyqtar emes, solardyń ishinde eń bir belsendi basshylar bola bilgen – Imanǵali Tasmaǵambetov, Qyrymbek Kósherbaev pen Nurlan Nyǵmatýlin siiaqty azamattarmen qyzmettes boldym. Osy kisilerdiń janynda júrip, talai ideologiialyq, uiymdastyrýshylyq tásilderdi teń meńgerip, biraz tájiribe jinadym.
Árqaisysymen bir salada jumys isteý men úshin úlken bir mektep boldy. Úsheýi de birinen biri ótken pedant. Jazǵan qaǵazyńdy jái bir sholyp ótpeidi, muqiiat oqyp, mektepte úi tapsyrmasyn teksergen muǵalim sekildi, qoiý qara siia qalammen árbir jibergen qateńdi taýyp, astyn syzyp, jazǵanyńnyń ústine shymailap, basqa da nebir oilardy qosyp jiberedi. Sóitip, kúnine tórt-bes ret kiresiń, kirgen saiyn taǵy bir qate taýyp, taǵy bir jańa sóz tirkesteri men tsitatalardy jazyp beredi. Sonda men gazette isteitin jýrnalist, al olar sol gazettiń redaktorlary bolsa bir sóz ǵoi, joq, olai emes.
Sonyń arasynda ózge adamdardy qabyldap, turǵyn úi, qurylys, jol máseleleri boiynsha jinalystardy ótkizip, talai sharýashylyq máselelerdi tas-talqan etip sheship jatady. Tyńdap, baqylap otyrsań, ómir boiy sol qurylys, jol máselelermen ainalysyp júrgendei, bárin biledi, bárinen habardar. Aqyn-jazýshylardy ertip kelseń, olardyń jazǵan áńgime óleńderin ózderine jatqa aityp berip otyrady. Sóilese árqaisysy sózge sheshen, maqal-máteldetip, ómirden mysaldar keltire, kez kelgen aýditoriiany ózderine birden op-ońai-aq baýrap alady. Iaǵni, bilimpaz, oqymysty, jáne ózderinen kóp biletin, kóp oqityn azamattardy qastaryna jinap júredi. Osy kúnge deiin oqyǵan kitaptarymyzben almasyp turamyz.
Komsomoldyqtardyń uiymdastyrýshylyq qasietteri bir bólek. Sondyqtan jaýapty is-sharalardy negizinen solarǵa júkteitin. Sebebi, atqaratyn isterine adal, jaýapkershilikpen jasaidy. Kez kelgen iske tiianaqty, olar úshin maida-shúide suraq degen joq, bári mańyzdy, bári jedel, bári negizgi. Barǵan jerinde áskeriler siiaqty tártipti ornyqtyryp, qaramaǵyndaǵylaryn sap-sapqa túzep, maidanda júrgendei qatal minezben basqaryp otyrady.
Qysqasy, aitaiyn degenim, komsomoldyq olar úshin ideologiia emes, ol basqarý, uiymdastyrý tásili. Búginde jas sheneýnikter muhit asyp, Garvardtaǵy Kennedi basqarý mektebine barǵany siiaqty, komsomoldyqtar úshin de sol bir kez - bir mektep. Al, olar - sol mekteptiń túlekteri. Myna sońǵy oqiǵada da, komsomoldyqtardyń sol tiianaqtylyǵy, baiaǵy ádetpen joǵary deńgeide jasamaq bolyp, árlep, ásemdeimiz degen talpynystary ózderine jaǵymsyz kózqaras týdyryp aldy.
Árine, Alashtyqtardyń júz jyldyq toiy kóleńkede qalyp, al komsomoldyń ǵasyrlyq toiy dúrkirep ótip jatqany, shynymdy aitsam, meni qynjyltady. Biraq, bylai qarap otyrsań bári de durys. Nege?! Sebebi, kim, qalaisha birige, uiymdasa aldy, solai toiyn toilady, ataitynyn atady.
Alashtyń júz jyldyǵyn da solai dúrkiretip ótkizýge bolar edi, tipti odan da asyryp jiberýge de múmkin edi. Biraq, ár jerden bir shýlap, aityp-aityp qoidyq. Sózge myqtymyz, al naqty iske kelgende, árqaisynyń myńdaǵan syltaýy shyǵa keldi. Moiyndaý kerek, Alash ideiasy ritorika deńgeiinen aspai qaldy. Al, shyn mánisinde, alashtyqtar memlekettilikti basty maqsat etip qoidy. Jáne olar azattyq úshin kúresi bir bólek, al sol derbes, táýelsiz memleketti saqtap, qorǵap turý úshin saiasi memlekettik basqarý tásilderin de barynsha meńgerýdi nasihattaǵan bolatyn. Sondyqtan, komsomoldyń júz jyldyǵy biz úshin qai jaǵynan bolsa da, jaqsy saiasi sabaq boldy.
