Almatynyń Almaly aýdandyq sotynda Muhtar Áýezov atyndaǵy qazaq memlekettik akademiialyq drama teatrynyń burynǵy direktory Erlan Bilálge qatysty qylmystyq isti qaraý jalǵasyp jatyr, dep habarlaidy Sputnik Qazaqstan tilshisi.
Erlan Bilál QR Qylmystyq kodeksiniń 24-baby, 3-bóligi, 366-baby, 2-bóliginde (para alýǵa oqtalý) qarastyrylǵan qylmysty jasady dep aiyptalýda. Sotta ol "Sezam" shyǵarmashylyq qorynyń prezidenti Baianovtan 2018 jyldyń 2 qańtary kúni 600 myń teńge alǵanyn aitty. 4 qańtar kúni 900 myń teńge alyp jatqan jerinen ustalǵan.
Ótken sot otyrystarynda Baianov sottalýshydan 600 myń teńge materialdyq shyǵyn talap etken bolatyn, aiyptalýshy tarap bul qarjyny tólegen. Degenmen búgin Baianov moraldyq shyǵyn retinde taǵy million teńge talap etip jatqany belgili boldy, qorǵaýshylar onymen kelispei otyr. Sot atalǵan máselege qatysty úkim shyǵaratyn kezde sheshim qabyldaidy.
Memlekettik aiyptaýshy Erlan Bilálge jaza retinde paranyń alpys eselengen kólemi — 90 million teńge óndirýdi surady. Sonymen birge prokýror múlikti tárkileýge negiz joq ekenin atap ótti. Sondai-aq ol sottan Erlan Biláldiń barlyq memlekettik nagradasy men medalderinen aiyrýǵa usynym engizýdi surady.
Qorǵaýshy tarap Qylmystyq kodekstiń 65-baby boiynsha (qatty ókinýine bailanysty qylmystyq jaýapkershilikten bosatý) Biláldi qylmystyq jaýapkershilikten bosatý nemese prokýror suraǵan aiyppul kólemin tómendetýdi surady. Sondai-aq onyń tórt balasy bar ekeni, onyń ekeýi kámeletke tolmaǵany atalyp ótti.
Bilál sottan úkim shyǵarar kezde óziniń densaýlyq jaǵdaiyn, kinásin moiyndaǵanyn nazarǵa ala otyryp, bas bostandyǵynan aiyrmaýdy jáne múmkin bolsa aiyppul kólemin tómendetýdi surady.
Esterińizge sala ketsek, 5 qańtarda M.Əýezov atyndaǵy akademiialyq qazaq drama teatrynyń direktory teatr bazasyn balalarǵa arnalǵan merekelik sharalardy ótkizýge jalǵa bergeni úshin 1,5 million teńge kóleminde para almaq bolǵany anyqtaldy.
QR eńbek sińirgen qairatkeri Erlan Bilál Áýezov atyndaǵy qazaq memlekettik akademiialyq drama teatryn 2015 jyldyń 27 sáýirinen beri basqaryp kelgen.
