Almaty qalasy Almaly aýdandyq sotynda M.Áýezov atyndaǵy Qazaq memlekettik akademiialyq teatrynyń eks-direktory Erlan Biláldiń isi boiynsha sot talqylaýy jalǵasyp jatyr, dep habarlaidy QazAqparat tilshisi.
Sot barysynda «Sezam» qorynyń direktory Qairat Baianov Erlan Bilálge aqshany qalai bergeni týraly aityp berdi.
«Sezam» direktory eń alǵash ret sottalýshymen 2017 jyldyń qazanynda kezdesken. Sol kezdesý barysynda syiaqy kólemi týraly ýaǵda bolǵan. Baianov Bilálge 1,5 mln teńge kóleminde aqshany bólip-bólip berýi tiis bolǵan.
«Soma týraly sóilespedik. Ol (Erlan Bilál - avt.) 1,5 mln teńgeni meńzedi. Jaraidy, kóreiik dedim», - dedi Baianov.
Keiinirek Baianov tergeý oryndarymen birge jumys jasai bastaǵan.
Alǵashqy 600 myń teńgeni Baianov konvertke salyp 3 qańtarǵa deiin bergen. Biraq Bilál aqshany tezirek berýin surap, qaita-qaita mazalaǵan.
Qalǵan 900 myń teńgeni Baianov 4 qańtarda berýi tiis boldy.
Buǵan deiin kýáger bolyp kelgen «Sezam» qorynyń direktory Qairat Baianov azamattyq aryzdanýshy bolýǵa niet bildirgen edi. Oǵan Biláldiń qorǵaýshysy men memlekettik aiyptaýshy qarsy shyǵyp, bul iste tek memleket japa shegýshi ekendigin jetkizdi.
Is materialdaryna qaraǵanda, Erlan Bilál «Sezam» qaiyrymdylyq shyǵarmashylyq qorynyń basshysy Qairat Baianovtan 1,5 mln teńge kóleminde para almaq bolǵan. Bul qarjyǵa teatr ǵimaratynda balalarǵa arnalǵan qoiylym ótýi tiis bolatyn.
Aldyńǵy sot otyrysynda Erlan Bilál 600 myń teńgeni qaryzǵa taratyp tastaǵanyn aitqan edi.
Eske sala keteiik, Almatyda M.Áýezov atyndaǵy Qazaq memlekettik akademiialyq drama teatrynyń direktory, belgili akter Erlan Bilál 1,5 mln teńge kóleminde para alyp jatqan jerinen ustalǵan bolatyn.
