Áýezov atyndaǵy qazaq memlekettik akademiialyq drama teatrynyń burynǵy direktory Erlan Bilál sotta sońǵy sózin aitty, dep habarlaidy Sputnik Qazaqstan tilshisi.
Erlan Bilál QR Qylmystyq kodeksiniń 24-baby, 3-bóligi, 366-baby, 2-bóliginde (para alýǵa oqtalý) qarastyrylǵan qylmysty jasady dep aiyptalýda. Sotta ol "Sezam" shyǵarmashylyq qorynyń prezidenti Baianovtan 2018 jyldyń 2 qańtary kúni 600 myń teńge alǵanyn aitty. 4 qańtar kúni 900 myń teńge alyp jatqan jerinen ustalǵan.
Ol sońǵy sózinde qiyn jaǵdaiǵa tap bolǵanyn, kinásin moiyndap, ókingenin atap ótti. Bilál sottan otbasylyq jáne densaýlyq jaǵdaiyn nazarǵa ala otyryp, bas bostandyǵynan aiyrmaýdy jáne memlekettik aiyptaýshy suraǵan aiyppul kólemin múmkindiginshe tómendetýdi ótindi.
Sondai-aq ol sottan ataqtary men marapattaryn "tartyp almaýdy" surady.
"Shyǵarmashylyq adamy retinde qurdymǵa ketpeýim úshin, odan ári jyljýǵa kúsh tabý úshin meniń ataqtarymdy tartyp almaýyńyzdy ótinemin… ", — dedi ol.
Erlan Bilál buryn eshqashan politsiiaǵa túspegenin aita kele, kóz jasyna erik berdi.
"Men kinálimin, qatelestim, ótinemin, eger zań buǵan múmkindik berse, balalarym úshin meni qoldap jiberińiz. Eger maǵan qoldaý kórsetseńiz, elimizdiń igiligi úshin qaitadan eńbek etemin, stýdentterge qaita sabaq beremin ", — dedi Bilál.
Memlekettik aiyptaýshy Erlan Bilálge jaza retinde paranyń alpys eselengen kólemi — 90 million teńge óndirýdi surady.
Qorǵaýshy tarap Qylmystyq kodekstiń 65-baby boiynsha (qatty ókinýine bailanysty qylmystyq jaýapkershilikten bosatý) Biláldi qylmystyq jaýapkershilikten bosatý nemese prokýror suraǵan aiyppul kólemin tómendetýdi surady. Sondai-aq onyń tórt balasy bar ekeni, onyń ekeýi kámeletke tolmaǵany atalyp ótti.
Esterińizge sala ketsek, 5 qańtarda M.Əýezov atyndaǵy akademiialyq qazaq drama teatrynyń direktory teatr bazasyn balalarǵa arnalǵan merekelik sharalardy ótkizýge jalǵa bergeni úshin 1,5 million teńge kóleminde para almaq bolǵany anyqtaldy.
QR eńbek sińirgen qairatkeri Erlan Bilál Áýezov atyndaǵy qazaq memlekettik akademiialyq drama teatryn 2015 jyldyń 27 sáýirinen beri basqaryp kelgen.
