Muhtar Áýezov atyndaǵy Qazaq drama teatrynyń direktory Erlan Bilál sot aldyna bardy, - dep habarlaidy Tengrinews.kz tilshisi.
Almatynyń Almaly aýdandyq sotynda QR eńbek sińirgen qairatkeri Erlan Bilálǵa qatysty basty sot otyrysy ótti. Oǵan QR Qylmystyq kodeksiniń 24-babynyń 3-bóligi jáne 366-babynyń 2-bóligi "Para alýǵa oqtalý" boiynsha aiyp taǵyldy. Sotqa deiingi tergeý organynyń málimeti boiynsha, Bilál "Sezam" qoǵamdyq qaiyrymdylyq shyǵarmashylyq qorynyń prezidenti Qairat Baianovtan Áýezov teatrynyń qabyrǵasynda jańajyldyq qoiylymdar qoiý úshin 1,5 million teńge para almaq bolǵan.
Sotta sýdia Qýanysh Áripov tórelik etti.
«Kúdikti tergeý kezinde óz kinásin tolyq moiyndady. Onyń kinási is materialdarymen dáleldendi», - dedi memlekettik aiyptaýshy.
"Syiaqy týraly kelistik, sosyn 2 qańtarda kezdesip, ol maǵan 600 myń teńge berdi. Ekinshi ret 4 qańtarda 900 myń teńge berdi de, men sol kúni ustaldym. Kinámdi tolyq moiyndaimyn, ókinish bildiremin. Basynda Baianov maǵan ózi usynǵan. Bizde jylda shyrshalar, qoiylymdar ótedi. Ózi keldi. Qazaqsha aitqanda rizalyǵyn bildirý úshin. Basynda somany da ózi aitqan bolatyn. 600 myńdy qaida jaratqanym esimde joq, qaryzdarymdy qaitaryp júrgenmin. Eshkim qysym jasaǵan joq, kinámdi ózim moiyndadym", - dedi Erlan Bilál sot otyrysy kezinde.
Aita keteiik, Erlan Biláldiń advokaty istiń BAQ ókilderiniń qatysýynsyz ótýin suraǵan edi. Sýdia taraptar pikirin tyńdap, aýdiojazbaǵa, sýretke jáne videoǵa túsirýge tyiym saldy.
Sonymen qatar, qorǵaýshy kýágerlerdi - belgili ártister Asanáli Áshimov pen Bolat Ábdilmanovty tyńdaýdy ótindi. Olar Erlan Bilálovti sipattaityndyqtan sýdia olardyń iske qatysýyna ruqsat berdi.
Cotqa Erlan Bilálǵa aryz túsirgen Qairat Baianovtyń advokaty da keldi. Prokýror isti shegerýdi usyndy. Qairat Baianovtyń ózi sotqa kýáger retinde qatysty.
Munyń aldynda sot Erlan Biláldi kepilmen bosatqan edi. Ol 1 million 205 myń teńge kóleminde kepil somasyn berdi.
Eske salaiyq, 5 qańtarda QR eńbek sińirgen qairatkeri, akter, M. Áýezov atyndaǵy Qazaq memlekettik akademiialyq drama teatry basshysy Erlan Bilálov 1,5 million teńge paramen ustalǵany habarlanǵan bolatyn. Kinásin tolyq moiyndaýyna bailanysty Erlan Bilálov qamaýǵa alynbady.
Osydan keiin 9 qańtarda Áýezov teatry direktory mindetin atqarýshy taǵaiyndalǵan. Al 17 qańtarda Erlan Biláldiń isi sotqa túsken edi.
