"Erkek bolsań shyq": Gúlbaný Ábenova depýtat Nazarovty jekpe-jekke shaqyrdy

Foto: kollaj Ult.kz

Jýrnalist Gúlbaný Ábenova depýtat ári sportshy Ardaq Nazarovty MMA erejesi boiynsha ashyq jekpe-jekke shaqyrdy. Bul týraly ol óz jazbasynda málimdedi, dep habarlaidy Ult.kz.

Ábenova bul jekpe-jekti tikelei efirde ótkizýdi usynyp otyr. Onyń aitýynsha, «oktagon» retinde efir alańy tańdalmaq.

«Siz halyqqa kóp ýáde berdińiz, kóp sóz aittyńyz. Endi sóz emes, is qajet. Tikelei efirde bilim, eńbek joly, ómirbaianyńyz týraly suraqtaryma ashyq jaýap berińiz. Qolǵaptyń ornyna diplomdaryńyzdy, stýdent kezińizdegi sýretterińizdi, kýrstastaryńyzben túsken fotolaryńyzdy alyp kelińiz. Halyq bárin óz kózimen kórsin», — dedi jýrnalist.

Gúlbaný Ábenova bul aiqasty «shyndyq, ádilet pen aqiqat úshin kúres» dep atap, halyqtyń senimi Nazarovtyń judyryǵynda tursa, onyń qalamynda turǵanyn aitty. 

Sondai-aq ol Ardaq Nazarovty «er azamat bolsańyz, oktagonǵa shyǵyp, halyq aldyndaǵy ashyqtyqty dáleldeńiz» dep ashyq shaqyrdy.