Qazaqstan Táýelsizdiginiń 30 jyldyǵyna orai QR Aqparat jáne qoǵamdyq damý ministrliginiń bastamasymen «Balapan» telearnasynyń janynan «Erekshe bilim alý qajettilikteri bar balalarǵa arnalǵan animatsiia mektebi» alǵashqy túlekterin ushyrdy.
QR Aqparat jáne qoǵamdyq damý ministrliginiń baspasóz qyzmeti taratqan aqparatqa qaraǵanda, 2021 jyldyń naýryz aiynda bastalǵan jobanyń alty ailyq oqý kýrsyn arnaiy irikteýden ótken 30 qatysýshy sátti támamdap, arnaiy sertifikattarmen marapattaldy.
Oqý kýrsy aqysyz negizde, jeke animatsiialyq stýdiialardyń atsalysýymen qaiyrymdylyq joba retinde júzege asyryldy. Balalardy oqýǵa qajet arnaiy planshetter men ózge de tehnikalyq quraldarmen «Qazaqstan» telekorporatsiiasy qamtamasyz etken.
Ministrliktiń bastamasymen balalarǵa sapaly bilim berý maqsatynda halyqaralyq bailanystar ornatyldy. Ońtústik Koreianyń Mýltiplikatsiialyq filmderdi nasihattaý agenttigimen Yntymaqtastyq memorandýmyna qol qoiylyp, kelisim jasaldy. Nátijesinde Ońtústik Koreia men Japoniianyń úzdik mýltiplikator mamandary animatsiia mektebiniń qatysýshylaryna onlain dáris oqyp, sheberlik sabaqtaryn ótkizdi.
Erekshe bilim alý qajettilikteri bar balalarǵa bolashaqta mamandyǵyna ainalatyn kásipti úiretý arqyly jańa múmkindik syilaý, erekshe balalardy áleýmettik beiimdeýge járdemdesý jáne olardyń bos ýaqytyn tiimdi ótkizýdi uiymdastyrý maqsatynda qurylǵan mekteptiń alǵashqy túlekteri Qazaqstannyń túrli aimaǵynda turatyn 14-16 jas aralyǵyndaǵy daryndy balalar. Oqý baǵdarlamasy onlain formatta, arnaiy sabaq kestesine sai júrgizilgen.
Oqýshylar alǵashqy aida «Animatsiia negizderi» taqyrybyndaǵy jalpy dáriske qatysyp, animatsiia salasymen tanysty. Keiin qyzyǵýshylyǵy men beiimine, múmkindigine qarai 2D animation, 3D animation jáne Stop Motion toptaryna bólinip, bilim aldy.
«Sátti júzege asyrylǵan jobaǵa qatysýǵa ótinimderdiń áli de tolastamaýyna bailanysty Animatsiia mektebiniń jumysyn turaqty túrde jalǵastyrý josparlanyp otyr», - delingen habarlamada.
