Qazaqstanda erekshe qajettiligi bar balalardy úi jaǵdaiynda ońaltýǵa baǵyttalǵan pilottyq joba óz tiimdiligin kórsetti. Búgingi kúnge deiin joba aiasynda 628 balaǵa keshendi ońaltý kómegi kórsetilse, olardyń 470-inde damý men densaýlyq kórsetkishteriniń oń dinamikasy tirkelgen, dep habarlaidy ult.kz.
Zamanaýi ońaltý jabdyqtary men tsifrlyq sheshimderdi úide qoldanýdyń arqasynda balalardyń qimyl-qozǵalys daǵdylary aitarlyqtai jaqsarǵan. Olar basyn ózdiginen ustaýdy, óz betinshe otyrýdy, súienip turýdy meńgerip, alǵashqy qadamdaryn jasai bastaǵan.
«QH. Múgedektigi bar balalardy úi jaǵdaiynda ońaltý» pilottyq jobasyn Áleýmettik qorǵaý salasyn damytýdyń ulttyq ǵylymi ortalyǵy men «Qazaqstan halqyna» qoǵamdyq qory birlesip júzege asyryp jatyr. Jobanyń negizgi maqsaty – joǵary tehnologiialyq ońaltý qyzmetin balalardyń turǵylyqty jerinde qoljetimdi etý.
Qazirgi ýaqytta joba Shymkent qalasy, Qyzylorda, Pavlodar jáne Abai oblystarynda iske asyrylýda. Qatysýshylarǵa kópfýnktsionaldy beiimdelgen kreslolar, MyWay júrip-turý qurylǵylary, vertikalizatorlar men arnaiy trenajerlar siiaqty zamanaýi tehnikalyq ońaltý quraldary beriledi. Jalpy joba aiasynda 405 arnaiy tehnika birligi paidalanylyp jatyr.
Inkliýziia departamentiniń direktory Ǵaziza Imanǵalidyń aitýynsha, jobanyń tiimdiligi mýltidistsiplinarlyq sarapshylar tobynyń úzdiksiz qashyqtan súiemeldeýimen qamtamasyz etiledi. Mamandar ár balaǵa jeke ońaltý baǵdarlamasyn ázirlep, onyń oryndalýyn tsifrlyq kúndelik arqyly qadaǵalaidy. Al ata-analar kún saiyn oryndalǵan jattyǵýlar týraly málimetterdi engizip otyrady. Bul naqty ýaqyt rejiminde ońaltý josparyn qajetine qarai túzetip, otbasynyń emdeý protsesine belsendi qatysýyna múmkindik beredi.
Mamandardyń pikirinshe, pilottyq jobanyń oń nátijeleri elimizdegi áleýmettik qoldaý júiesin odan ári jetildirýge negiz bolady. Jyl sońyna deiin jobany Soltústik Qazaqstan, Batys Qazaqstan, Mańǵystaý jáne Ulytaý oblystaryna keńeitý josparlanyp otyr.
