Túrkiia Prezidenti Rejep Erdoǵan 12 aqpanda Máskeýdi Siriianyń Idlib provintsiiasynda beibit azamattarǵa shabýyl jasap, zábir kórsetti dep aiyptady. Túrik áskerilerine taǵy shabýyl jasasa, úkimet kúshterine "jaýap beretinin" aityp, qoqan-loqy kórsetti.
Reseidiń qorǵanys ministrligi Erdoǵannyń aitqandaryn joqqa shyǵardy. Ministrliktiń aitýynsha, Siriiadaǵy terroristik toptar beibit turǵyndardy "tiri qalqan" retinde qoldanady.
Osy apta basynda Idlibtegi Túrkiianyń baqylaý posty shbaýylǵa ushyrap, ondaǵan sarbaz qaza tapqan. Ankara aimaqta soǵysty toqtatý úshin Máskeýdi Siriia prezidenti Bashar Asadqa yqpal etýge úndedi.
Sársenbi, 11 aqpanda túrik jáne siriialyq BAQ amerikalyq sarbazdar men Asad áskeriniń qaqtyǵysy týraly jazdy. Qaqtyǵystan bir beibit turǵynnyń ólgeni aitylady. Qolda bar málimet boiynsha, siriialyq sarbazdar Amerika saqshylaryn toqtatyp, aspanǵa oq atqan. AQSh áskerileri buǵan "jaýap retinde" oq atyp, sonyń saldarynan bir adam kóz jumǵan. Budan soń amerikalyq ushaqtar keminde bir ret áýeden soqqy jasaǵan.
AQSh koalitsiiasy siriialyq sarbazdarmen qaqtyǵys bolǵanyn rastady. Reuters agenttigi áskerilerdiń málimdemesin taratty. AQSh tarabynyń aitýynsha, jaǵdai turaqtanǵan jáne saqshylar bazaǵa oralǵan. Oqiǵanyń jai-japsary zerttelip jatyr. Degenmen koalitsiia málimdemesinde qaza bolǵan adam men áýe soqqysy jaily aitylmaidy.
Siriianyń úkimet kúshteri birneshe aptadan beri Idlib provintsiiasynda qarýly oppozitsiialyq toptarǵa shabýylyn jalǵastyryp jatyr. Resei de, Túrkiia da Siriiadaǵy qaqtyǵysty toqtatý boiynsha kelissózge qatysyp júr, biraq ekeýi eki tarapty qoldaidy. Máskeý Asad áskerine qoldaý kórsetedi, Ankara oppozitsiia kúshterindegi belgili bir toptardy qoldaidy.
AQSh bastaǵan halyqaralyq koalitsiia 2014 jyly Siriiadaǵy radikaldy toptarmen kúres bastaǵan. Koalitsiia Siriianyń demokratiialyq oppozitsiia kúshterin qoldaidy. Resei Siriiada áskeri operatsiiasyn 2015 jyly kúzde bastaǵan. Ol prezident Bashar Asad áskerin qoldap, birneshe jyldan beri jalǵasyp kele jatqan azamattyq soǵysta Asadtyń basymdyqqa ie bolýyna yqpal etken. Batys Máskeýdi adam quqyǵyn óreskel buzdy dep aiyptaǵan.
