Foto:t.me/bort_01
Túrkiia prezidenti Rejep Taiyp Erdoǵan qazaqstandyqtarǵa qonaqjailyǵy úshin alǵys bildirip, Aziiadaǵy ózara is-qimyl jáne senim sharalary jónindegi keńestiń (AÓSShK) sammitinde málimdeme jasady, - dep habarlaidy Tengrinews.kz agenttigi.
"Qymbatty aǵam, Qasym-Jomart Toqaev myrza, qurmetti qonaqtar, men AÓSShK sammitine qatysqanyma qýanyshtymyn. Toqaev myrzaǵa jáne qazaq baýyrlarǵa qonaqjailyq úshin alǵysymdy bildiremin. Sondai-aq, osy otyrysqa qatysqan Kýveitke qosh keldińizder deimin. Munyń barlyǵyna jaqsylyq ákelgenin qalaimyn", - dedi Túrkiia prezidenti.
Erdoǵannyń aitýynsha, Túrkiia basynan bastap konferentsiiaǵa qatysýshylar quramyn keńeitý bastamasyn qoldaǵan.
Ol jahandyq qaýipsizdik arhitektýrasy neǵurlym ádil jáne teń quqyqty túsiný negizinde qurylýy kerek ekenin atap ótti.
"Ýkrainadaǵy keiingi daǵdarysty aimaqtyq jáne jahandyq deńgeide kórip otyrmyz. Ádil álemge árqashan diplomatiia arqyly qol jetkizýge bolady. Soǵysta jeńimpaz, al ádil álemde jeńilgen jaq bolmaidy. Ekinshi jaǵynan, bizdiń BUU-men soǵystyń jaǵymsyz saldaryn joiý jónindegi qarqyndy kúsh-jigerimiz búkil álem boiynsha moiyndaldy. Qara teńiz arqyly Ýkraina astyǵyn eksporttaý týraly Ystambul kelisimi jáne ótken aida bastalǵan tutqyn almasý jumystary - osy baǵyttaǵy eleýli jetistikter. Bizdiń maqsatymyz - jergilikti jerlerdegi barlyq qiyndyqqa qaramastan, qol jetkizilgen qarqyndy saqtaý jáne qantógisti múmkindiginshe tezirek toqtatý", - dedi Erdoǵan.
Sonymen qatar, Túrkiia prezidenti lańkestik týraly aityp, Aýǵanstanda beibitshilik pen turaqtylyq ornatý qajet ekenin jetkizdi.
Aita keteiik, Erdoǵan Astanaǵa 12 qazanda ushyp keldi. Elordalyq áýejaida ony Qasym-Jomart Toqaev ózi qarsy aldy.
