Májilis Spikeri Erlan Qoshanov Qazaqstan Respýblikasynyń Prezidenti Qasym-Jomart Toqaevtyń tapsyrmasymen IV Dúniejúzilik kóshpendiler oiyndarynyń saltanatty ashylý rásimine qatysty, dep habarlaidy "Ult aqparat" tómengi palatanyń baspasóz qyzmetine silteme jasap.
Kóshpendiler oiyndaryna álemniń 102 elinen 3 myńnan astam sportshy qatysyp jatyr. Qazaqstannyń atynan 50 sportshy saiystyń bes túrinen baq synasady. Olar – kókpar, qazaq kúresi, dástúrli sadaq atý, jamby atý, kók bóri.
Májilis Tóraǵasy dúbirli doda aldynda Qazaqstan qurama komandasy múshelerimen arnaiy kezdesti. Olarǵa Memleket basshysynyń jyly lebizin jetkizip, jeńis tiledi.
Erlan Qoshanov Dúniejúzilik kóshpendiler oiyndary baýyrlas elderdiń mádeni bailanystaryn kúsheitip, túrki áleminiń ortaq qundylyqtaryn álemge pash etýde mańyzy zor ekenin atap ótti.
– Qazir kúlli Qazaqstan halqy sizderge jankúier bolyp otyr. Qorjyndaryńyz altynǵa tolsyn. Qazaq sportshylarynyń qandai myqty ekenin dúbirli dodada dáleldep, el abyroiyn asqaqtata berińizder, – dedi Májilis Spikeri.
Is-shara aiasynda Erlan Qoshanov Túrkiia Respýblikasynyń Prezidenti Rejep Taiip Erdoǵanmen kezdesti. Májilis Tóraǵasy Atajurttan Qazaqstan Prezidenti Qasym-Jomart Toqaevtyń jyly lebizi men zor yqylasyn jetkizip, Túrkiiada alǵash ret ótkizilip jatqan Dúniejúzilik kóshpendiler oiyndarynyń saltanatty ashylýymen quttyqtady.
– Jyl ótken saiyn bizdiń memleketterimiz arasyndaǵy yntymaqtastyq artyp kele jatyr. Bul Ózińizdiń Qazaqstan Prezidenti Qasym-Jomart Toqaevpen dostyq qarym-qatynastaryńyz ben jemisti dialogtyń nátijesi dep bilemin. Osy oraida Sizdiń osy jylǵy qazan aiyna josparlanǵan Qazaqstanǵa saparyńyzdy asyǵa kútýdemiz. Bul sapar baýyrlas elderimizdiń arasyndaǵy tyǵyz qarym-qatynasty jańa deńgeige kóterip, odan ári nyǵaiýyna zor múmkindik týǵyzatynyna senimdimiz, – dedi Erlan Qoshanov.
Óz kezeginde, Túrkiia Prezidenti Qazaqstannyń túrki álemi men Túrki memleketteri uiymyndaǵy mańyzdy rólin atap ótip, Májilis Spikerine IV Dúniejúzilik kóshpendiler oiyndarynyń ashylýyna qatysqany úshin rizashylyǵyn bildirdi.
– Qazaqstandaǵy turaqtylyq búkil óńir úshin mańyzdy. Bul oraida Prezident Qasym-Jomart Toqaevtyń júrgizip jatqan reformalary men kezekten tys Prezidenttik sailaý ótkizý jónindegi bastamasyn qoldaimyn. Qazaqstandaǵy úderisterdi erekshe baqylap otyrmyn. Jalpy, Qazaqstan men Túrkiia arasyndaǵy ekijaqty qatynastar joǵary deńgeide damyp keledi. Osy oraida parlamentaralyq yntymaqtastyqtyń mańyzdylyǵy zor, – dedi Rejep Erdoǵan.
Májilis Spikeri Qazaqstan Parlamenti men Túrkiia Uly Ulttyq Jinalysy arasyndaǵy, sonyń ishinde parlamentaralyq uiymdar aiasynda ekijaqty yntymaqtastyqtyń qazirgi aýhaly týraly baiandap, birlesken jumys barlyq sala boiynsha belsendi jalǵasa beretinin aitty.
Sondai-aq, ol Qazaqstan kelesi V Dúniejúzilik kóshpendiler oiyndaryn ótkizý jóninde usynys bergenin aityp, túrki qoǵamdastyǵy ony qoldaitynyna senim bildirdi.
Sonymen birge Erlan Qoshanov Túrkiianyń burynǵy Premer-Ministri Binali Iyldyrymmen kezdesip, taraptar eki el yntymaqtastyǵynyń qarqyndy damyp kele jatqanyn atap ótti.
