30 qyrkúiekte politsiia qyzmetkerleri áleýmettik jelide Elmira Tólegenovanyń jubaiymen bolǵan janjal týraly jariialaǵan jazbasyn anyqtady. Videoda ol oqiǵanyń mán-jaiyn aityp, qolyndaǵy qyzarǵan izderdi kórsetti, dep habarlaidy ult.kz.
Astana politsiiasynyń málimetinshe, oqiǵa ornyna politsiia qyzmetkerleri baryp, erli-zaiyptylar arasynda turmystyq janjal bolǵanyn anyqtaǵan. Elmira Tólegenova politsiiaǵa aryz jazýdan bas tartqan.
Soǵan qaramastan, otbasylyq-turmystyq qatynastar salasyndaǵy quqyqqa qaishy áreketterge bailanysty Erbolat Janabylovqa qatysty ákimshilik material toltyryldy.
Ol ákimshilik jaýapkershilikke tartylyp, ýaqytsha ustaý bólmesine qamaldy. Is materialdary sotqa joldandy.
Sondai-aq politsiianyń habarlaýynsha, 28 tamyzda Janabylov probatsiialyq baqylaý talaptaryn buzǵan. Ol saǵat 22:00-den keiin ózi kórsetken turǵylyqty jerde bolmaǵan. Bul derek boiynsha da materialdar sotqa jiberildi.
Janabylovtar oqiǵasy: Buǵan deiin ne bolǵan?
Erbolat Janabylov buǵan deiin eki jylǵa shartty túrde sottalǵan.
Erbolat Janabylovtyń 30 qyrkúiektegi otbasylyq janjaldan keiin politsiiaǵa jetkizilýine bailanysty onyń buǵan deiingi sot úkimi de qaita nazarǵa ilikti.
2026 jylǵy 27 sáýirde Astana soty Erbolat Janabylov pen jubaiy Elmira Tólegenovany Qylmystyq kodekstiń 214-baby — «Zańsyz kásipkerlik» jáne 218-baby — «Qylmystyq jolmen alynǵan aqshany nemese ózge múlikti zańdastyrý» boiynsha kináli dep tanydy.
Sot Erbolat Janabylovqa 2 jyl bas bostandyǵynan aiyrý jazasyn shartty túrde taǵaiyndady. Sonymen birge onyń múlkin tárkileý týraly sheshim qabyldanyp, eki jyl merzimge probatsiialyq baqylaý belgilendi.
Probatsiia talaptaryna sáikes, Janabylovqa turǵylyqty jáne jumys ornyn ruqsatsyz aýystyrmaý, túngi ýaqytta úiden shyqpaý jáne psihoaktivti zattardy meditsinalyq maqsattan tys qoldanbaý mindettelgen.
Politsiianyń 1 qazanda taratqan aqparatyna sáikes, Janabylov 28 tamyzda probatsiialyq baqylaý talabyn buzǵan: saǵat 22:00-den keiin ózi kórsetken mekenjaida bolmaǵan. Osy derek boiynsha material sotqa joldanǵan.
Al Elmira Tólegenovaǵa sol is boiynsha 2 jyl bas bostandyǵynan aiyrý jazasy taǵaiyndalǵan. Úsh kámeletke tolmaǵan balasynyń bolýyna bailanysty jazany óteý eki jylǵa keiinge qaldyrylǵan.
Aita keteiik, Erbolat Janabylov pen Elmira Tólegenovaǵa tiesili avtokólikter aýktsionǵa shyǵaryldy.
