Elimizde tárbieshilerdiń 25 paiyzdan astamynda balabaqshada jumys isteýge qajetti bilim joq. bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Bilim berý salasynda kúrdeli mindetter tur. Búginde bilim berý júiesinde kóp problemalar jinaqtalyp qaldy. Onyń ishinde balalardyń qaýipsizdigi, olardyń tárbielik jáne bilimdilik deńgeii, pedagogtardyń kásibiligi, innovatsiialar sany bar. Álemdik reitingterdiń málimetterine sáikes, Qazaqstan bala tárbiesi boiynsha sońǵy 73-orynǵa turaqtady. PISA nátijesi oqýshylardyń saýattylyǵy tómendigin kórsetti. Sondyqtan baiypty saraptama qajet. Bilimniń barlyq sanatyndaǵy jaǵdaidy jaqsartý boiynsha búkil sharalardy qabyldaý kerek», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblikalyq tamyz keńesi barysynda.
Sonymen qatar ol elimizde balabaqshalar sanynyń arta túskendigin, sońǵy 3 jylda ǵana 891 balabaqsha ashylǵandyǵyn aita kele, sapa máselesine erekshe toqtaldy.
«Búginde olar qoǵamnyń da, ata-analardyń da kóńilinen shyqpaidy. Bul problemany jan basyna qarjylandyrý da sheshe almaidy. Barlyǵy úshin birdei memlekettik tapsyrys jekemenshik jáne memlekettik balabaqshalarda ártúrli ornalastyrylady. Bul jumys sapasyna belgili bir deńgeide kúdik týdyrady. Balalardyń kezegi saqtalyp, kezekke qoiý baiaý avtomattandyrylýda. Balalardyń 40 paiyzy ǵana elektrondy joldama alǵan», - dedi ol.
Premer-Ministr orynbasarynyń dereginshe, elimizde tárbieshilerdiń 25 paiyzdan astamynda balabaqshada jumys isteýge qajetti bilimi joq.
«Álemdik tájiribede qabyldanǵan balabaqshalardyń jumys sapasy kórsetkishin shuǵyl engizýdi tapsyramyn. Bul kórsetkishte ata-analardyń qanaǵattanýshylyq deńgeiin, qoǵam baǵasyn, balalardyń damýy deńgeiin, tamaqtaný sapasyn qosý qajet», - dedi Eraly Toǵjanov.
