Jer reformasy jónindegi komissiianyń birinshi otyrysynda 10 sotyq jer telimin berý máselesi kóterildi, dep habarlaidy "Ult aqparat".
«10 sotyq jer telimi boiynsha Kodekste jazylǵan. Unai ma, unamai ma - berý kerek, ol - Kodeks normasy. Sondyqtan bul máselede barlyǵyn retke keltirgen jón», - dedi Eýropalyq quqyq jáne adam quqyǵy sarapshylyq institýtynyń direktory, saiasatker Marat Bashimov.
Óz kezeginde QR Premer-Ministriniń orynbasary Eraly Toǵjanov kóterilgen másele jan-jaqty qaralatynyn aitty. Onyń sózinshe, 10 sotyq jer telimin bólýge qatysty eń aldymen tiisti jumystar atqarylýy kerek. Iaǵni jer telimi beriletin bolsa, infraqurylymnyń salynýyna erekshe nazar aýdarylýy tiis.
«Infraqurylymnyń ózin júrgizý úshin orta eseppen 4 trln-nan artyq qarajat kerek bolady. Sondyqtan osynyń barlyǵyn esepteýimiz kerek. Bul baǵyttaǵy jumystar bir kúnde sheshiletin másele emes», - dedi Toǵjanov.
