Foto: businessinsider.com
5 qyrkúiekte Eýropalyq komissiia Google kompaniiasyn jarnama almasý quraly AdX arqyly naryqtaǵy ústemdigin teris paidalanǵany úshin 2,95 mlrd eýro aiyppul tóleýge mindettedi. Bul týraly Euronews habarlady.
Eýrokomissiianyń málimetinshe, Google baspagerlerge arnalǵan jarnama serverin jáne jarnamany satyp alý quraldaryn paidalaný arqyly naryqtaǵy básekelestikti shektegen.
— Endi Google múddeler qaqtyǵysyn joiý úshin mańyzdy sharalar usynýy tiis. Eger kompaniia muny jasamasa, biz qatań sharalardy qoldanamyz. Tsifrlyq naryqtar adamdarǵa qyzmet etýge arnalǵan jáne senim men ádildik qaǵidatyna negizdelýi tiis, — delingen básekelestik máseleleri jónindegi eýrokomissar Teresa Riberanyń málimdemesinde.
Google-ǵa básekelestikke qarsy dep tanylǵan tájiribeni toqtatýǵa 60 kún ýaqyt berildi.
Aita keteiik, Eýropalyq komissiia Google-ǵa qatysty onlain-jarnama tehnologiialary sektoryndaǵy resmi tergeýdi 2021 jylǵy maýsymda bastaǵan.
Kompaniia vitse-prezidenti Li-Enn Malholland aiyppuldy «negizsiz» dep atap, talap etilgen ózgerister «myńdaǵan eýropalyq kásiporyndarǵa ziianyn tigizip, olardyń tabys tabýyn qiyndatatynyn» aitty.
Google juma kúni Eýrokomissiia sheshimine shaǵym túsiretinin málimdedi.
Euronews atap ótkendei, sheshim AQSh pen EO arasyndaǵy shielenis aiasynda qabyldandy. Buǵan deiin AQSh prezidenti Donald Tramp eýropalyq tarapty amerikalyq IT-kompaniialardy qýdalasa, kedendik baj engizýmen qaitadan ses kórsetken bolatyn.
Jaqynda Frantsiia da Google men Shein kompaniialaryna rekordtyq kólemde aiyppul saldy.
