Eýroodaq "Lýgansk halyq respýblikasy" men "Donetsk halyq respýblikasynyń" táýelsizdigin moiyndaǵan Reseidiń birqatar azamaty men uiymyna sanktsiia saldy, dep habarlaidy Azattyq.
Tizimge qorǵanys ministri Sergei Shoigý, prezident ákimshiliginiń jetekshisi Anton Vaino, memlekettik dýma vitse-spikeri Petr Tolstoi, Resei SIM resmi ókili Mariia Zaharova, Russian Today telearnasynyń jetekshisi Margarita Simonian, júrgizýshi Vladimir Solovev, News front mediaholdinginiń basshysy Konstantin Knyrik, sonymen birge aqparat quraldary "trolder fabrikasy" dep ataityn "Internet-zertteýler agenttigi" engen. Odan bólek, sanktsiia tizimine úkimet jetekshisiniń orynbasary Dmitrii Grigorenko, VEB.RF tóraǵasy Igor Shývalov, kásipker Evgenii Prigojinniń anasy men áieli de engen.
Shekteýlerdiń sonymen birge Qara teńiz flotyna jetekshilik etetin Igor Osipov, áýe-ǵarysh kúshteriniń jetekshisi Nikolai Evmenov, qurlyqtaǵy ásker bas qolbasshysy Oleg Saliýkovqa da qatysy bar. Uiymdar arasynda "Resei", "Promsviazbank", VEB.RF bankteri tizimge engen.
23 aqpanda kúndiz Eýroodaq Reseige salynatyn sanktsiia paketin maquldaǵan. Shekteý sharalaryna sáikes, sanktsiia tizimine engen adamdar men uiymdardyń aktivteri buǵattalyp, qarjylaryn paidalanýyna tyiym salynady. Olar sonymen birge EO aýmaǵyna kire almaidy nemese tranzit dálizi retinde paidalanyp, ózge elge óte almaidy.
Buǵan qosa, Eýroodaq Reseidiń memlekettik qaryzyna sanktsiia salyp, Eýroodaq kapitaly men qarjy naryǵyna shekteý qoidy. Sanktsiia sonymen birge Eýroodaq pen Ýkraina shyǵysyndaǵy separatistik respýblikalarmen kez kelgen ekonomikalyq qatynas ornatýǵa tyiym salady.
23 aqpanda AQSh "Soltústik aǵys –2" gaz qubyrynyń operatory Nord Stream 2 AG kompaniiasy men basshylyǵyna sanktsiia salǵan.
22 aqpanda Ulybritaniia reseilik bes bank pen Vladimir Pýtin ainalasyndaǵy úsh reseilik milliarderge (milliarderler Boris jáne Igor Rotenberg, Gennadii Timchenko) sanktsiia salǵan.
Sol kúni AQSh prezidenti Djo Baiden AQSh Resei elitasynyń birqatar ókilderine jáne olardyń otbasyna, reseilik VEB jáne áskeri bankke sanktsiia salatynyn málimdegen.
