Resei áskeri naýryz aiynda basyp alǵan Ýkrainanyń Zaporoje oblysy Energodar qalasyndaǵy turǵyn úilerdiń birinde 22 mamyrda tańerteń jarylys boldy.
Ýkrainany jaqtaityn jáne reseishil telegram-arnalarynyń habarlaýynsha, podezde Resei "taǵaiyndaǵan qala meri" Andrei Shevchik turady. Ol "Oppozitsionnaia platforma — Za jizn" partiiasynan qala keńesine sailanǵan, Resei áskerimen yntymaqtastyq ornatqan burynǵy depýtat.
Resei áskerimen yntymaqtastyq ornatýdan bas tartqan qala meri Dmitrii Orlovtyń aitýynsha, Shevchik pen birneshe kúzetshisi jaralanǵan. Beibit turǵyndar zardap shekpegen. Degenmen keibir aqparat kózderi "ózin qala merimin dep ataǵan" Shevchiktiń jaralanbaǵanyn jazdy.
Áleýmettik jelide taraǵan sýretterge qaraǵanda, qoldan jasalǵan jarylǵysh zat iske qosylǵan. Ázirge oqiǵany eshkim moinyna almady. Resei jaǵy resmi aqparat taratpady.
Zaporoje AES-i ornalasqan Energodar turǵyndary Resei basqynshylyǵyna qarsy narazylyqqa shyqqan. Keiingi kúnderi jergilikti órt sóndirýshiler men qutqarýshylar qalalyq qutqarý qyzmeti jetekshisiniń qamalýyna narazylyq bildirip keledi. Resei aqparat quraldary men blogerleri óz kezeginde "jergilikti turǵyndar Reseidi qoldaidy" degen aqparat taratty.
