Sybailas jemqorlyqqa qarsy is-qimyl agenttigi basshylyǵynyń qatysýymen Energetika ministrliginde keńes ótti. Kún tártibinde – preventsiia, aldyn alý jáne qoǵamdyq baqylaýdy kúsheitý máseleleri, dep habarlaidy sybailas jemqorlyqpen kúres vedomstvosynyń baspasóz qyzmeti.
Energetika ministri Nurlan Noǵaev qyzmettiń jáne kórsetiletin memlekettik qyzmetterdiń ashyqtyǵy men aiqyndyǵyn qamtamasyz etý boiynsha vedomstvonyń kúsh-jigerin jandandyrǵanyn atap ótti.
«Byltyr birqatar biznes-úderister ońtailandyryldy. Jer qoinaýyn paidalaný quqyǵyn berý máselesi onlain-formatqa kóshirildi, jer qoinaýyn barlaý jáne igerý jónindegi ortalyq komissiianyń quramy kúsheitilip, táýelsiz sarapshylar quramy keńeitildi, qoǵam belsendileri tartyldy. El basshylyǵy men Úkimettiń tikelei tapsyrmasyna sáikes bul baǵyt jalǵasady», - dep atap ótti Nurlan Noǵaev.
Agenttik Tóraǵasy Alik Shpekbaev energetika salasynyń qyzmetkerlerine júktelgen joǵary jaýapkershilikke nazar aýdardy: «Otyn-energetika kesheni álemniń kez kelgen eliniń áleýmettik-ekonomikalyq damýynyń lokomotivi bolyp tabylady. Bizdiń memleketimizde ol basqa salalar men áleýmettik salanyń damýy men sátti jumys isteýine yqpal etetin biýdjet kiristeriniń negizgi bóligin qamtamasyz etedi. Bul saladaǵy sybailas jemqorlyqtyń mýltiplikativti áseri bar, sebebi bolmashy sybailas jemqorlyq táýekelderi tutastai alǵanda el úshin aitarlyqtai saldarǵa ákep soqtyrýy múmkin».
Ol Atom jáne energetikalyq qadaǵalaý men baqylaý komitetiniń aýmaqtyq departamentterinde qyzmet alýshylar úshin qolaily jaǵdai jasaý jáne tutynýshyǵa baǵdarlanýdy qamtamasyz etý siiaqty azamattarmen ózara is-qimyldyń servistik úlgisine kóshýdiń mańyzdylyǵyn eske saldy.
2020 jyly kelýshilerdiń qoljetimdiligin jeńildetý úshin Ministrliktiń ortalyq apparatynda ǵimarattyń birinshi qabatynda ornalasqan «Adaldyq alańy» jobalyq keńsesi ashyldy. Ár niet bildirýshi azamat keńes alatyn nemese shaǵymmen júgine alatyn jedel jeli uiymdastyryldy (8-7172-786938).
Qyzmetkerler azamattyq qoǵam ókilderimen birlesip jer qoinaýyn paidalaný, gaz jáne gazben jabdyqtaý salasyndaǵy problemalyq máselelerdi, sondai-aq elektr energetikasy salasyndaǵy baqylaý-qadaǵalaý fýnktsiialaryn zerdeleýge nazar aýdarady.
Osyǵan orai Agenttik janyndaǵy arnaiy monitoringtik tobynyń jetekshisi Aigúl Soloveva: «Ministrlik qyzmetkerleri jurtshylyq úshin ashylýy tiis. «Energetika ministrligi – Adaldyq alańy« jobalyq keńsesi óz quramyna azamattyq qoǵam men BAQ ókilderin tartý arqyly ózara is-qimyldyń tiimdi alańyna ainalýy tiis».
Keńes barysynda investitsiialyq tartymdylyqty nyǵaitý turǵysynan Ministrlik qyzmetiniń ashyqtyǵyn arttyrý máseleleri de talqylandy. 2020 jyldyń jeltoqsanynda alǵash ret jer qoinaýyn paidalaný quqyǵyn alýǵa aýktsiondyq saýda-sattyq ótkizilgeni atap ótildi. 263 mln teńge deńgeiindegi jiyntyq bastapqy baǵa 230 eseden astam ósip, 61 mlrd teńgege jetti.
Eldiń ishki naryǵyna suiytylǵan munai gazyn jetkizýdi avtomattandyrylǵan josparlaýdy engizý pysyqtalýda. Bul shara sybailas jemqorlyq táýekelderin jáne adami faktordy boldyrmaýǵa múmkindik beredi, bul óz kezeginde protsestiń ashyqtyǵyn qamtamasyz etedi.
Ministrlik elektrondyq alańdar arqyly saýda-sattyq kólemin kezeń-kezeńmen ulǵaitýdy da kózdep otyr. Tolyqqandy kóshý 2021 jyldyń sońyna deiin júredi. Osylaisha, negizdelgen baǵa tájiribesi qalyptasady. Bul mámilelerdiń transparenttiligin, eldi gazben jabdyqtaý senimdiligin arttyrýdy jáne kóleńkeli eksportty joiýdy bildiredi.
Munai men gaz kondensatyn esepke alýdyń aqparattyq júiesin qurý da josparda bar. Shyn máninde, bul munai men gaz kondensatyn daiyndaý, tasymaldaý, saqtaý, jóneltý, satý, aýmaqqa ákelý jáne elden shyǵarý monitoringi, baqylaý quraly bolady. Bul baǵyt Tsifrlyq damý, innovatsiialar jáne aeroǵarysh ónerkásibi ministrligimen yntymaqtastyqta iske asyrylady.
