Foto: t.me/baidildinovoil
Astana men Almatydaǵy qoǵamdyq kóliktegi jolaqy 500 teńge bolýy kerek dep málimdegen Energetika ministriniń burynǵy keńesshisi, sarapshy Oljas Baidildinovke qatysty QR Energetika ministrligi túsinikteme berdi, dep habarlaidy Ult.kz.
"Keibir BAQ-ta Oljas Baidildinov "QR Energetika ministrligi janyndaǵy Qoǵamdyq keńestiń múshesi" retinde kórsetilgen materialdar jariialanǵanyna jáne onyń qoǵamdyq kóliktegi jolaqy tarifteri jónindegi pikirlerine qatysty Ministrlikke suranystar túsip jatqanyna bailanysty tómendegini habarlaimyz:
Oljas Baidildinov QR Energetika ministrligi janyndaǵy Qoǵamdyq keńestiń múshesi bolyp tabylmaidy.
Onyń qoǵamdyq kólik qyzmetteri tarifterin qalyptastyrý máseleleri boiynsha aitqan pikirleri jeke kózqarasy bolyp tabylady jáne Qazaqstan Respýblikasynyń memlekettik organdarynyń resmi ustanymyn bildirmeidi.
Qoǵamdyq kólik qyzmetteri tarifterin qalyptastyrý jergilikti atqarýshy organdardyń (ákimdikterdiń) quzyretine jatady. Atalǵan másele Energetika ministrliginiń qyzmet salasyna kirmeidi jáne onyń kún tártibinde joq", - delingen habarlamada.
Buǵan deiin sarapshy Oljas Baidildinov Astana men Almatydaǵy qoǵamdyq kóliktegi jolaqy qazirgi 110–120 teńgeniń ornyna 500 teńge bolýy kerek dep málimdegen edi.
Baidildinovtiń pikirinshe, qoǵamdyq kólik salasyndaǵy memlekettik sýbsidiialar ashyq emes, jemqorlyqqa jol ashady jáne qyzmet sapasyn arttyrmaidy. Ol sýbsidiialardy alyp tastap, jolaqyny naryqtyq erkin baǵamen belgileýdi jáne jol qashyqtyǵyna qarai saralanǵan tólem júiesin engizýdi usyndy.
Eske salaiyq, 2022 jylǵy qandy Qańtar oqiǵalary kezinde Baidildinov suiytylǵan gaz baǵasynyń qymbattaýyna bailanysty aitqan pikirinen keiin qoǵamda túrli reaktsiia týdyrǵan edi. Ol sol kezde baǵa ósimine narazy bolǵandarǵa «qoǵamdyq kólikke aýysyńyzdar» dep keńes berip, gazdyń litrine 15–20 teńgege qymbattaýy — eleýsiz soma ekenin, «qazir biz internetke budan da kóp tóleimiz» dep aitqan bolatyn. Bul sózi narazylardyń ashýyn týǵyzdy.
