Soltústik óńirlerdi gazdandyrý úshin «Saryarqa» magistraldyq gaz qubyrynyń 2 jáne 3 kezeńderin salý máselesi pysyqtalýda. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Ótken jyldyń jeltoqsan aiynda Elbasymyzdyń «Besinshi áleýmettik bastamasyna» sáikes uzyndyǵy 1061 shaqyrym bolatyn «Saryarqa» magistraldyq gaz qubyrynyń I kezeńi paidalanýǵa berildi. Qyzylorda oblysynan bastaý alatyn «Saryarqa» gaz qubyrynyń I kezeńi elordany, ortalyq jáne soltústik óńirlerdiń bir bóligin ekologiialyq taza otyn túrimen qamtamasyz etýge múmkindik beredi. Bul táýelsizdik alǵan sátten bastap elimiz úshin mańyzdy tarihi oqiǵalardyń biri bolyp sanalady. Soltústik óńirlerdi gazdandyrý úshin «Saryarqa» magistraldyq gaz qubyrynyń 2 jáne 3 kezeńderin salý máselesi pysyqtalýda«, - dedi Nurlan Noǵaev.
Onyń aitýynsha, halyqqa gaz berý úshin «Saryarqa» magistraldyq gaz qubyrynyń 1-shi kezeńiniń trassasy boiynda Nur-Sultan qalasynda, Qaraǵandy jáne Aqmola oblystarynda gaz taratý jelileriniń qurylysy júrgizilýde.
«Elordany gazdandyrý 3 kezekke bólingen. Qazirgi ýaqytta ákimdik 9 iske qosý kesheni bar 1-shi kezektiń qurylysyn júrgizýde. Elordany gazdandyrýdyń 2 jáne 3 kezegi boiynsha qazirgi ýaqytta jobalaý jumysy júrgizilýde. Qaraǵandy oblysynda avtomattandyrylǵan gaz taratý stansalarynan Qaraǵandy, Temirtaý jáne Jezqazǵan qalalaryna burý men taratý jelilerin salý qarastyrylǵan. Barlyq úsh qalada 1-kezektegi bir iske qosý keshenderi boiynsha qurylys-montajdaý jumystary júrgizilýde», - dedi ol.
Ministr Aqmola oblysynda gaz taratý jelileriniń qurylysy
2 kezekke bólingenin aitady.
«1-shi kezekte Arshaly jáne Tselinograd aýdandarynyń 20 eldi mekenin gazdandyrý úshin 13 jobany iske asyrý qarastyrylǵan. Gazdandyrýdyń 2-shi kezeginiń nysandary jobalaý satysynda», - dedi ol.
