Ministr munai baǵasynyń joǵary bolýy biýdjet pen Ulttyq qorǵa úlken kiris ákeletinin túsindirdi.
"Biylǵy munai óndirý boljamy 87,5 million tonna bolsa, onyń 17,9-y otandyq óńdeý. Osyǵan sáikes, eksport qandai ekenin oilai berińiz. Munai baǵasy joǵary bolsa, valiýtalyq túsim de, salyq túrindegi túsimder de ósedi. Onda jaman eshteńe joq. Biraq munai baǵasy óte joǵary bolsa, bul jaqsy emes. Óitkeni barlyq ilespe shyǵyn materialdary – qubyr ónimderi, himiialyq reagentter, óndiris protsesine qatysty barlyq zattar da qymbattaidy. Ókinishke qarai, munai baǵasy tómendegen kezde, bul shyǵyn materialdary birdei arzandai bermeidi. Budan munai óndirýshi kásiporyndar zardap shegedi, óitkeni olardyń ekonomikasy aitarlyqtai quldyraidy", - dep túsindirdi Aqsholaqov.
Onyń aitýynsha, Qazaqstan úshin qolaily munai baǵasy - 80 dollar. Janar-jaǵarmai baǵasyna keletin bolsaq, onyń aitýynsha, qazir belgilengen shekti baǵany burynǵy deńgeide ustaý josparlanǵan.
"Qazir naryqty reformalaýmen ainalysyp jatyrmyz, iaǵni ónimsiz deldaldardy joiý. Eshqandai investitsiiasy joq, infraqurylymy joq, zaýyttary, janarmai quiý beketteri joq deldaldar. Múmkin, olardy bul tizbekten shyǵarýǵa týra keledi, bul baǵany ońtailandyrýǵa múmkindik bolady", - dedi ol.
6 qańtarda jappai tártipsizdikke ulasqan mitingilerden keiin Úkimet áleýmettik-ekonomikalyq jaǵdaidy turaqtandyrý úshin shuǵyl sharalar qabyldady. Gazǵa, benzinge jáne dizel otynyna 180 kúnge shekti baǵa belgilendi.
