QR Aqparat jáne qoǵamdyq damý ministrliginiń Jastar jáne otbasy isteri komitetiniń tóraǵasy Madiiar Qojahmet Qazaqstanda volonterlikti qoldaý baǵytyndaǵy aýqymdy jumystardyń josparymen bólisti, – dep habarlaidy QazAqparat.
«Volonterler jylyna bailanysty jalpy eriktiler jumysyna degen qyzyǵýshylyqty arttyrý josparlanǵan. Birshama usynys ta túsip jatyr. Atap aitqanda, biyl «Áleýmettik stýdenttik nesie» atty jobasyn bastadyq. Ol boiynsha stýdent jastarǵa volonterlik qyzmettiń ár saǵaty úshin 1 000 teńgeden tólenedi. Olar osy somany oqý qajettiligine jumsap, bazalyq shyǵyndaryn ótei alady», - dedi Madiiar Qojahmet OKQ-da ótken baspasóz máslihatynda.
Onyń aitýynsha, volonterlik qyzmettiń ár saǵaty úshin tólenetin qarajat respýblikalyq biýdjetke engizilip qoiǵan.
«Operator – Bilim jáne ǵylym ministrligi. Qazvolunteer.kz saity bar. Atalǵan saitta volonterlik qyzmet kórsetýge nieti bar jastar tirkeledi. Qazir JOO stýdentteri tirkelip jatyr. Biraq, kelesi jyly protsesske kolledj stýdentteri de tartylar degen úmittemiz», - dedi ol.
Komitet tóraǵasynyń aitýyna qaraǵanda, budan buryn aitylǵandai, volonterlik qyzmet merzimin eńbek kitapshasyna engizý jumysy da pysyqtalý ústinde.
«Bul – Eýropa elderinde keńinen taralǵan tájiribe. Damyǵan elderde belsendi volonterlik qyzmet – qosymsha basymdyqqa ie. Sonymen birge, Memleket basshysy óz sózinde volonterlikti damytýdyń jeti baǵytyn ataǵan edi. Osy baǵyttar aiasynda arnaiy jobalar jasalady. Máselen, «Qamqorlyq» jobasy aiasynda Jeńistiń 75 jyldyǵy qarsańynda volonterlerdi eskertkishterdi qalpyna keltirý isine tartý kózdelgen. Buǵan qosa arhivterdi tsifrlandyrý isiniń mańyzy alǵa shyqty. Bul baǵytta da volonterler toby jasaqtalady», - dedi ol.
Madiiar Qojahmet óz sózinde reseilik mamandardyń qatysýymen volonterliktiń halyqaralyq keńesi qurylǵanyn aityp ótti.
«Jumys baǵyttaryn aiqyndap alý úshin reseilik áriptestermen aýqymdy úsh kezdesý uiymdastyrmaqpyz. Osydan 2 jyl buryn Reseide «Eriktiler jyly» ótken bolatyn», - dedi ol.
Eske sala ketsek, Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev volonterlik jumystardyń negizgi baǵyttaryn ataǵan bolatyn. Óz kezeginde QR Aqparat jáne qoǵamdyq damý ministri Dáýren Abaev Qazaqstan óńirlerinde volonterlikti qoldaýǵa arnalǵan ortalyqtar ashylatynyn habarlaǵan edi.
