Oblys ákimi Berik Ýáli «Eńbek joly» konkýrsynyń óńirlik kezeńiniń jeńimpazdaryn marapattady. Saltanatty sharaǵa baiqaýǵa qatysýshylar, eńbek áýletteriniń ókilderi, túrli sala mamandary men jas qyzmetkerler qatysty.
Biyl Abai oblysy boiynsha konkýrsqa ótinim qabyldaý 21 sáýir men 1 tamyz aralyǵynda júrgizildi. Osy kezeńde oblystyń túrli salalarynda eńbek etetin azamattardan 24 ótinim tústi. Baiqaý «Úzdik eńbek áýleti», «Jumys isteitin jastardyń úzdik tálimgeri» jáne «Óndiristiń úzdik jas mamany» nominatsiialary boiynsha uiymdastyryldy. Konkýrstyq komissiia sheshimimen úsh nominatsiia boiynsha óńirlik jeńimpazdar anyqtaldy.
Aimaq basshysy eńbek adamyna qurmet kórsetý, kásibi sheberlik pen urpaqtar sabaqtastyǵyn dáripteýde baiqaýdyń mańyzy zor ekenin atap ótti.
«Memleket basshysy Qasym-Jomart Kemeluly Toqaev eńbek kýltin ilgeriletý, qarapaiym eńbek adamdaryna qurmet bildirý, adal eńbektiń qadirin arttyrý basty mindet ekenin erekshe atap ótkeni barshańyzǵa belgili. Osy oraida, eńbek adamynyń qoǵamdaǵy mártebesin arttyrýǵa jáne eńbek ónimdiligin yntalandyrýǵa baǵyttalǵan «Eńbek joly» konkýrsynyń mańyzy erekshe. Búgin eńbegimen elge úlgi bolyp júrgen azamattardy qurmettep, olardy saltanatty túrde marapattaý úshin jinalyp otyrmyz. Ár salada mamandyqqa adaldyqtyń shynaiy úlgisin kórsetip qana qoimai, kásibi biliktiligimen kózge túsip, óz isiniń qyr-syryn jetik meńgergen eren eńbekterińiz bar qurmetke laiyq. Munyń barlyǵy – Abai oblysynyń damýyna qosylǵan naqty úles dep bilemiz», – dedi Berik Ýáli.
Aiagóz qalasynda turatyn Baiǵozovtar áýleti «Úzdik eńbek áýleti» nominatsiiasynyń óńirlik jeńimpazy bolyp tanyldy. Áýlet músheleriniń temirjol salasyndaǵy jalpy eńbek ótili 262 jyldan asady. Qajiiahmet Baiǵozov – úlken otbasynyń qurmetti aqsaqaly. Onyń úlgisimen otbasynyń birneshe urpaǵy ómirin temirjol salasymen bailanystyrǵan.
«Meniń zeinetke shyqqanyma 35 jyl boldy. Ákem temirjolshy edi. Áke jolyn jalǵap, men de ómir boiy temirjol salasynda eńbek ettim. Alty balamnyń beseýi meniń jolymdy qýyp, osy salany tańdady. Jastarǵa aitarym – qandai mamandyqty tańdasańdar da, eńbekteriń adal bolsyn. Adal eńbek qashanda abyroiǵa jetkizedi», – dedi Qajiiahmet Baiǵozov.
«Jumys isteitin jastardyń úzdik tálimgeri» nominatsiiasynda Kýrchatov qalasynan Almira Aidarhanova jeńimpaz atandy. Ol «QR Ulttyq iadrolyq ortalyǵy» RMK «Radiatsiialyq qaýipsizdik jáne ekologiia institýty» filialynyń monitoring jáne ekologiialyq-taldamalyq zertteýler bólimin basqarady. 200-ge jýyq ǵylymi jumys pen jariialanymnyń avtory jáne birlesken avtory. Onyń jetekshiligimen 7 magistrant magistrlik dissertatsiia qorǵap, 80-ge jýyq ǵylymi eńbek jariialaǵan.
«Óndiristiń úzdik jas mamany» nominatsiiasynyń jeńimpazy – Semei qalasynan Aibol Tynyshtyqov. Ol eńbek jolyn «Semei avtoqurastyrý zaýytynda» traktor qurastyrý jelisiniń slesar-jinaýshysy bolyp bastaǵan. Óndiriste jinaqtaǵan tájiribesi men kásibi biliktiliginiń nátijesinde 2025 jyldyń aqpan aiynda tehnikalyq bólimge injener-tehnolog qyzmetine aýystyryldy.
Shara barysynda baiqaýǵa belsendi qatysqan eńbek áýletterine, tálimgerler men jas mamandarǵa qurmet kórsetildi. Óńirlik kezeńde jeńimpaz atanǵan úsh qatysýshy respýblikalyq deńgeidegi irikteý kezeńine qatysady.
Óńirde halyqty turaqty jumyspen qamtý jáne azamattardyń kásipkerlik bastamalaryn qoldaý baǵytyndaǵy jumystar jalǵasýda. Biyl Óńirlik jumyspen qamtý kartasy aiasynda 13 324 adamdy jumyspen qamtý josparlanǵan. Jyl basynan beri 14 myńǵa jýyq azamat jumysqa ornalastyryldy. Áleýmettik osal sanattaǵy 97 azamatqa jańa biznes-ideialaryn júzege asyrý úshin 1 mln 730 myń teńgeden qaitarymsyz grant berildi. Eńbek naryǵyndaǵy suranysqa sáikes 234 azamat kásiptik oqýǵa joldanyp, onyń 145-i oqýyn aiaqtap, jumysqa ornalasty.
