QR Premer-Ministriniń orynbasary Eraly Toǵjanov eńbek ujymyndaǵy ereýilderdi retteitin zańnamalyq baza ázirleýdi tapsyrdy, dep habarlaidy QazAqparat.
«Eńbek ujymdarynda sanktsiia berilmegen ereýilder men sherýlerdiń beleń alǵanyn eskersek, jumysshylardyń talaptaryn aitý protsedýralaryn zańnama aiasynda ońtailandyrý kerek. Eńbek daýlary týyndaǵan jaǵdaida ony sheshýdiń naqty zańnamalyq úlgileri aiqyndalýy qajet. Mundai shara eńbek daýlaryn quqyq aiasynda sheshýge múmkindik beredi», - dedi Eraly Toǵjanov Eńbek jáne halyqty áleýmettik qorǵaý ministrliginiń keńeitilgen alqa májilisinde.
Sondai-aq, vitse-premer syrtqy kóshi-qon protsesin aimaqtardyń jumyspen qamtý áleýetin eskere otyryp retteitin usynys daiyndaýdy tapsyrdy.
«Syrtqy kóshi-qon boiynsha naqty sheshimder qabyldaityn ýaqyt keldi. Onyń ishinde Túrkistan, Mańǵystaý oblystaryna bailanysty másele bar. Mańǵystaýǵa adamdar ábden qonystanyp bolǵannan keiin, endi basqa óńirlerge tarataiyq degen suraqtar týyndap jatady. Syrttan kelgen azamattardy birden naqty óńirlerge baǵyttaý kerek. Ol boiynsha sizderden naqty usynystar kútemiz», - dedi Úkimet basshysynyń orynbasary.
