Elektrondyq eńbek birjasynda 125 myńnan astam bos jumys orny jáne 75 myńnan astam túiindeme ornalastyrylǵan, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
Elektrondyq eńbek birjasynda (EEB) enbek.kz saityna mamyr aiynyń basynda Qazaqstan boiynsha jumys berýshilerden 125,4 myń bos jumys orny ornalastyrylǵan. Al, jumys izdeýshilerdiń túiindemesi eki ese az, iaǵni 75,7 myńdy quraidy.
«Eńbek resýrstaryn damytý ortalyǵy» AQ sarapshylarynyń aitýynsha, bos jumys oryndary men túiindemeler sanynyń kúrt tómendeýi naýryz aiynda tirkelgen. Máselen, bos oryndar sany 2019 jyldyń sońynda 68,9 myńnan 2020 jyldyń naýryz aiynda 34,2 myńǵa deiin azaidy. Túiindeme sany aǵymdaǵy jyldyń aqpan aiynda 29 myń bolsa, naýryz aiynda 20,1 myńǵa deiin tómendegen.
«Bos jumys oryndary men túiindemelerdiń kúrt tómendeýi elde engizilgen tótenshe jaǵdai rejimimen tikelei bailanysty. Alaida, karantindik shekteýler alynyp, naryqqa jan bitip, kásiporyndar jumysyn qaita bastady jáne olar kadrlarǵa muqtaj», - dep túsindirdi «Eńbek resýrstaryn damytý ortalyǵy» AQ vitse-prezidenti Baljan Shamenova.
Túiindemeler sany boiynsha suranysqa ie kásiptiń birinshi úshtigine 2,6 myń - avtokólik júrgizýshisi, 2,3 myń – meditsina (medbike) qyzmetkerleri jáne 2,2 myń – zańger kirdi. Alaida, jumys berýshiler úshin qajet mamandardyń úshtigine - patrýldeý inspektory, kúzetshi jáne meditsinalyq qyzmetkerler endi. Eń az suranysqa ie mamandyqtar (túiindemeler men bos oryndar araqatynasy boiynsha) - zańger, is júrgizýshi jáne dene shynyqtyrý muǵalimi.
Jalpy, jumys berýshiler tarapyna eń úlken suranysqa ie mamandar: kásibi mamandar - 36,6 myń, qyzmet kórsetý jáne satý salasynyń qyzmetkeri – 21,2 myń, qurylys, kólik jáne basqa da uqsas sala jumysshylary – 19,5 myń bos jumys orny bar.
