QR Eńbek jáne halyqty áleýmettik qorǵaý ministri Birjan Nurymbetov elimizde indet kezinde oryn alǵan jumyssyzdyq problemasyna qatysty oiyn bólisti, dep habarlaidy QazAqparat.
«Bul men úshin de kúrdeli saýal bolyp tur. Óitkeni, bizdegi jumyssyzdyq deńgeii men jumyssyzdar sanyn QR Ulttyq ekonomika ministrliginiń statistika komiteti qadaǵalap otyrady. Ókinishke qarai, olar áli resmi derekterdi jariia etken joq. Ekinshi toqsannyń málimetteri 12 tamyzǵa qarai bolady. Degenmen, biz eńbek naryǵyna baǵdarlanýǵa tiispiz. Ekinshi jaǵynan jumyspen qamtý ortalyqtaryna tirkelý de jumyssyzdyq deńgeiiniń beinesin kórsete alady. Sondyqtan biz ózimiz de baǵalap jatamyz. Ár óńirdiń sanitar dárigeriniń sheshimin, qandai kásiporyndar qyzmeti shektelgenin, onda qansha adam jumys istep jatqanyn qaperge alamyz», - dedi ministr ortalyq kommýnikatsiialar qyzmetindegi brifing barysynda BAQ ókilderiniń saýalyna orai.
Onyń atap ótýinshe, elimizde jumyssyzdyq deńgeii sáýir aiynda shyrqaý shegine jetken. Sol aida respýblikada 4 mln 200 myń adam jumyssyz qalǵan.
«Odan keiin shekteýler alynǵan joq, jumyssyzdyq deńgeiin 1 mln 145 myń adam deńgeiinde baǵaladyq. Maýsymda birshama erkindik bolyp, jumyssyzdar sany shamamen 735 myń adamǵa deiin tómendedi. Shildede shekteý sharalary kúsheitildi. Shamamen 1 millionǵa jýyq adam jumyssyz qalar dep oiladyq. Qazir karantin jalǵasýda jáne aidyń sońynda baǵa beremiz», - dedi Birjan Nurymbetov.
