QR Eńbek jáne halyqty áleýmettik qorǵaý ministri Serik Shápkenov infliatsiiaǵa bailanysty Qazaqstanda jalaqyny kóterý múmkindigi týraly suraqqa jaýap berdi, dep habarlaidy QazAqparat.
Májiliste tilshiler Eńbek ministrinen «dollar baǵamynyń ósýi saldarynan eldegi taýarlar qymbattaitynyn, osy oraida qazaqstandyqtardyń jalaqysy óse me?» dep surady.
Óz kezeginde vedomstvo basshysy halyqtyń tabysyn arttyrýǵa qatysty Prezident tapsyrma bergenin eske saldy.
«Bizdiń ministrlik osy baǵytta jergilikti atqarýshy organdarmen, kásiporyndarmen tiisti jumysty bastap ketti. Tiisti taldaý jumystary arqyly tómen jalaqy deńgeii barlar anyqtalady. Bul turǵyda jumys berýshiler qaramaǵynda jumys istep júrgen adamdardyń jalaqysyn kóterýi úshin tiisti qadamdardy júrgizip jatyrmyz. Jumys berýshiler ózderinde isteitin qyzmetkerlerdiń jaǵdaiyn túsinip, qoldaý jasaýy kerek», - dedi Shápkenov.
Sonymen qatar ministr dollar baǵamynyń ósýiniń saldaryna jáne jalaqyny kóterýge qatysty qandai jumystar atqarylatynyn aitty.
«Biz Ulttyq ekonomika ministrligimen birlese ekonomikanyń ary qarai ilgerilýi turǵysynda iske asyrylatyn qadamdardy pysyqtap jatyrmyz. Osy oraida tiisti sheshimder qabyldanady dep oilaimyn», - dedi Shápkenov.
