Elimizde 30 myńnan astam er adam jumystan bas tartyp, balalaryna tólenetin ataýly áleýmettik kómek qarjysyna ómir súrýde. Bul týraly QR Eńbek jáne áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Jańa zań aiasynda tabysy tómen otbasylarǵa ataýly áleýmettik kómek taǵaiyndalady. Sonymen qatar, otbasynda eńbekke jaramdy adamdar bolsa, olarǵa jumys usynamyz. Eger de jumysqa qabiletti osy adam qyzmetten bas tartsa, onda AÁK búkil otbasyna tólenbeitin bolady», - dedi ministr.
Osy oraida, ol qoldanystaǵy zańnamada eńbekke jaramdy otaǵasy jumystan bas tarsa, búginde tek eńbekke qabiletti adamǵa ǵana qatysty áleýmettik kómek toqtatylatynyn eske saldy.
«Bizde usynylǵan jumystan bas tartatyndar óte kóp. Elimizde tepse temir úzetin 30 myńnan astam er adam jumystan bas tartyp, balalaryna tólenetin ataýly áleýmettik kómek qarjysyna ómir súrýde. Menińshe, bul jaǵdai durys emes, er azamat jumys isteýi kerek. Atap aitqanda, eger ol jumysqa tursa, onyń otbasyna beriletin AÁK tólemderi jalǵasa beredi. Jalpy, biz eńbekke jaramdy adamdardyń jaýapkershiligin arttyrýdy usynýdamyz», - dedi vedomstvo basshysy.
Bul turǵyda ol óńirlerge saparlary kezinde qandai jaǵdaiǵa tap bolǵanyn aitty.
«Eki aidyń ishinde 15 óńirge baryp, halyqpen kezdestim. Osy oraida kóptegen sharýa qojalyqtarynyń ókilderi adamdar usynylǵan jumysqa barmai jatqanyn aitty. Óitkeni zaiyby 200 myń teńge ataýly áleýmettik kómek alǵandyqtan, otaǵasy 100 myń teńgeniń jumysyna kirýden bas tartýda. Túrkistanda aýqymdy qurylys júrýde, alaida er azamattar 150 myń teńgelik jalaqyǵa barmai jatyr. Sebebi, olardyń otbasyna 200 myń teńge somasynda AÁK tólenýde. Jalpy, eńbekke jaramdy otaǵasy jumys istegeni durys», - dedi B. Nurymbetov.
