Foto: avtolombardini.ru
Qazaqstannyń damý banki bastaǵan avtokredit baǵdarlamasy jalǵasa beredi. Bul týraly Indýstriia jáne infraqurylymdyq damý vitse-ministri Iliias Ospanov málimdedi, dep habarlaidy Sputnik Qazaqstan.
4 paiyzdyq avtokredit baǵdarlamasy eń birinshi Qazaqstan damý bankiniń bastamasymen qolǵa alynǵan bolatyn.
Vitse-ministr Iliias Ospanovtyń aitýynsha, osy baǵdarlamaǵa 82 milliard teńge bólingen. Barlyq aqsha igerildi. Qazirgi kezde revolverlik júie, iaǵni berilgen avtokreditterdiń tólemderi esebinen qaita nesie rásimdelip jatyr.
"Jańaǵy 82 milliard teńge 2015 jyly Qazaqstannyń damý banki arqyly bólingen bolatyn. Ol baǵdarlama istep tur. Oǵan qatysty narazylyqtar bar. Ony da bilemiz. Avtobýs máselesin sheshkennen keiin sonymen qosymsha ainalysamyz", - dedi Ospanov arnaiy brifingte.
Onyń aitýynsha, Qazaqstannyń damý banki bastaǵan avtokredit baǵdarlamasyna ózgeris engizilýi múmkin. Sebebi búginde Ulttyq banktiń bazalyq mólsherlemesi joǵary, al kredittiń protsenti tym tómen.
Qazaqstanda taǵy bir avtokredit baǵdarlamasyna ónerkásipti damytý qory jaýapty. Avtokredit portalyn da osy mekeme iske qosqan. Bul baǵdarlamanyń aqshasyna avtobýstarǵa kredit beriledi.
Aita keteri, búgin Indýstriia jáne infraqurylymdyq damý ministri Marat Qarabaev jeńildetilgen avtokredit baǵdarlamasynyń toqtatylatynyn málimdedi. Onyń aitýynsha, endi barlyq aqsha avtobýstardy jańartýǵa jumsalady. Sebebi halyq qoǵamdyq kólikti jii paidalanady.
