QR Prezidenti janyndaǵy Qazaqstan strategiialyq zertteýler institýtynyń direktory Zarema Sháýkenova karantindi uzartý týraly sheshimge pikir bildirdi, dep habarlaidy QazAqparat.
«Búgin Memleket Basshysy Qasym-Jomart Toqaev eldegi epidemiologiialyq ahýaldyń problemalyq máseleleri boiynsha keńes ótkizdi. Prezident tapsyrmalarynyń arqasynda sońǵy eki aptada jaǵdai turaqtandy, al indetke qarsy is-qimyl sharalary tiisti deńgeige shyǵyp keledi. Alaida, arqany keńge salýǵa áli de erte. Sondyqtan shilde aiynda engizilgen shekteý sharalarynyń oń áserin odan ári nyǵaitý maqsatynda jáne shekaralas elderde koronovirýs infektsiiasymen bailanysty jaǵdaidyń asqyný yqtimaldylyǵyn eskere otyryp, Prezident Memlekettik komissiiaǵa karantindik sharalardy eki aptaǵa uzartýdy, keiinnen kezeń-kezeńimen jeńildetýdi tapsyrdy», - deidi sarapshy.
Onyń aitýynsha, koronavirýs ári uzaq ýaqyt bizben birge bolady. Tiisinshe, memleketke de, azamattardyń ózine de túsetin jaýapkershilik artady. Munda jaǵdaidy turaqtandyrý úshin keshendi sharalar qajet.
«Memleket kórsetken durys jáne ashyq aqparattyq saiasat, ýaqytyly jáne jan-jaqty áleýmettik-meditsinalyq qoldaý bizdiń – Qazaqstan azamattarynyń jaǵdaidyń jaqsarýyna degen senimin nyǵaitady. Provizorlyq jáne infektsiialyq statsionarlar bóliginiń jabylýy týraly habarlandy jáne basqalarynda oryn sany qysqarýda. Iaǵni, jaǵdai turaqtanyp keledi. Bul – virýspen kúresýdegi jetistikterimizdi kórsetetin mańyzdy jańalyq. Alaida, biz áli de aqparattyq alańǵa táýeldimiz, sondyqtan kelip túsken aqparat pen jańalyqtardy súzgiden ótkizip, durys baǵalaýdy úirený mańyzdy. Bul ózińizdi jáne jaqyndaryńyzdy jalǵan jańalyqtardyń jaǵymsyz áserinen qorǵaýǵa múmkindik beredi. Sondyqtan Úkimet otyrysynda osy kúrdeli kezeńde aqparattyq-túsindirý jumystaryn kúsheitý qajettigi aityldy», - deidi Z. Sháýkenova.
Sonymen birge, azamattardyń ózara qoldaýy da erekshe mańyzdy. Turǵyndar Internet, mobildi jáne onlain bailanys arqyly bir-birine qoldaý kórsete alady.
«Múldem beitanys adamnan da qoldaý kelýi múmkin. Barlyǵymyz azamattardyń bireýdiń qaiǵysyna bei-jai qaramastan qanshalyqty tez jumylatynyna kýá boldyq. Áleýmettik jeliler arqyly olar birneshe saǵat ishinde materialdyq, meditsinalyq jáne dári-dármekterdi izdeýge kómektesti.
Qazir kóptegen adamdar indetpen kúresti soǵyspen salystyrady jáne bul belgili bir dárejede shyndyqqa jaqyn. COVID-19 kórinbeitin jaý retinde, bir memleketke ǵana qaýip tóndirip qoimai, tutas álemdi qursaýǵa aldy. Búkil álem koronavirýs indetiniń ekinshi tolqyny bolatynyn aityp otyr. Jaqynda ǵana birneshe memleket, onyń ishinde Qazaqstan qatań karantindik sharalardy jeńildete bastaǵan edi. Keiin qandai da bir elderdiń basqalarǵa qaraǵanda tabysty kúresip jatyr dep aitýǵa áli erte ekeni baiqaldy. Óitkeni tájiribesi bastapqyda durys bolyp kóringen memleketter de qazirgi ýaqytta sanitarlyq-karantindik talaptardy kúsheitýge májbúr», - dedi QSZI basshysy.
Prezident karantindi uzarta otyryp, koronavirýstyq infektsiia juqtyrý men ólim-jitim kórsetkishterin odan ári tómendetýdiń airyqsha mańyzdylyǵyn atap ótti.
«Uzaqqa sozylǵan karantindik sharalar árine, qoǵamǵa, adamdarǵa jáne olardyń kózqarastaryna áser etedi. Indettiń kelýimen jáne onyń saldary men bastan keshken qaiǵyly tájiribeni eskere otyryp, árqaisymyzda moraldyq, qundylyqty qaita baǵalaý protsesi júrip jatyr. Eń basty qundylyq – adamnyń ómiri. Ol úshin karantindi uzartýdy qoldaý kerek jáne barlyq karantindik normalardy saqtaý qajet, bul – virýstyq infektsiianyń jappai taralýyn boldyrmaýdyń basty tásili. Sondyqtan árqaisymyzdyń ózimizge jáne jaqyndarymyzǵa jáne basqalardyń ómirine degen jeke jaýapkershiligimiz bolýy kerek jáne osy normalarmen ómir súrýdi úirenýimiz kerek. «Saqtanǵandy Qudai saqtaidy» degen sóz bar. Mańyzdy basymdyqtardyń biri – ulttyń densaýlyǵy bolýy kerek jáne árqaisymyz ony saqtaýǵa tyrysýymyz qajet», - dedi Zarema Sháýkenova.
